A Marosa avanza na súa renovación con 800.000 euros para mellorar as instalacións deportivas
O complexo deportivo da Marosa continúa coa súa renovación progresiva. O Concello de Burela acaba de rematar os traballos de conservación e mellora da grada sur do campo de fútbol, coincidindo co inicio dunha nova tempada deportiva.
A actuación permitiu poñer a punto unha estrutura que necesitaba labores de mantemento e conservación, mellorando as condicións de uso dunha instalación que concentra cada semana actividade de clubs, equipos de base e competición.
As obras forman parte dun plan máis amplo no que o Concello e a Deputación de Lugo mobilizan arredor de 800.000 euros para modernizar progresivamente o recinto. O investimento inclúe actuacións nas gradas, estruturas, vestiarios, accesibilidade e outros elementos das instalacións.
Un dos seguintes retos será a grada norte. O Concello continúa cos estudos e traballos técnicos necesarios para determinar a mellor solución para esta estrutura, nunha intervención que presenta unha especial complexidade.
O obxectivo é garantir a seguridade da instalación e, ao mesmo tempo, conservar os elementos que forman parte da identidade histórica da Marosa. A solución deberá adaptarse ás necesidades actuais sen perder o carácter dun campo estreitamente ligado á historia deportiva de Burela.
As actuacións tamén se estenden a outras zonas do complexo, con melloras no peche perimetral e diferentes traballos de mantemento e acondicionamento.
Estas intervencións súmanse a investimentos realizados nos últimos anos, entre eles a renovación do céspede artificial do campo da Marosa, financiada pola Deputación de Lugo.
O plan pretende abordar a renovación do complexo de maneira gradual, atendendo ás necesidades acumuladas e mellorando as instalacións para clubs, deportistas, familias e afeccionados que utilizan a Marosa ao longo de toda a tempada.