Pico da Lebre, un novo club en Foz para facer medrar a paixón polo xadrez
Por Ana Somoza.
O xadrez comeza a buscar o seu propio espazo en Foz. O Club Xadrez Pico da Lebre deu os seus primeiros pasos en xuño deste ano impulsado por un pequeno grupo de afeccionados que compartían unha mesma inquietude: contar cun punto de encontro no que poder xogar, aprender e reunir a todas aquelas persoas da zona que sentisen curiosidade polos taboleiros. Poucos meses despois da súa constitución, a entidade aínda está nunha fase inicial, pero os seus integrantes teñen claro que queren ir máis alá das partidas que agora disputan entre eles.
Os primeiros meses estiveron marcados, sobre todo, polos trámites necesarios para poñer en marcha oficialmente a entidade. Foi unha etapa menos visible, pero que tamén lles permitiu comprobar que en Foz e na contorna hai persoas interesadas neste deporte. “Tivemos a oportunidade de coñecer xente que lle gusta o xadrez coma nós e coa cal creamos novos vínculos”, explican desde o club. A intención agora é que eses contactos se transformen pouco a pouco nunha comunidade máis ampla.
OS INICIOS. Actualmente, Pico da Lebre conta con seis socios, que son tamén os integrantes da súa Xunta Directiva. É un núcleo reducido no que conviven diferentes xeracións, con membros que roldan os 50 anos e outros máis novos, de entre 20 e 25 aproximadamente. Unha diversidade de idades que encaixa precisamente cunha das ideas que queren transmitir: para sentarse diante dun taboleiro non hai unha idade determinada.
O reducido número de integrantes non preocupa polo momento. O club acaba de nacer e os seus responsables confían en que a situación cambie cando dispoñan dun espazo no que reunirse de maneira estable. “Esperamos que cando teñamos un local axeitado o club poida ter un número importante de socios”, apuntan.
Mentres ese local non chega, as partidas buscan acomodo en distintos establecementos de hostalaría de Foz. Os membros do club intentan reunirse polo menos unha vez á semana, aínda que en función da dispoñibilidade poden facelo con maior frecuencia. Son encontros que non se limitan a colocar as pezas e buscar o xaque mate. Despois das partidas chega tamén o momento de analizar movementos, decisións e erros.
“Cando nos xuntamos botamos partidas e comentámolas para aprender dos erros. Non se trata tan só de competir, senón tamén de aprender”, explican. Esa filosofía resume boa parte do proxecto: Pico da Lebre quere competir, pero tamén converterse nun lugar no que mellorar colectivamente.
PORTAS ABERTAS. E para entrar non é necesario saber aperturas, dominar estratexias nin levar anos xogando. O club quere precisamente eliminar a idea de que o xadrez é unha actividade reservada para persoas cun determinado nivel. “Hai sitio para todo aquel interesado en aprender o xogo. O nivel é o de menos. Todos estamos aprendendo”, recalcan.
A mensaxe para quen mire un taboleiro con curiosidade pero aínda non se atreva a achegarse é clara: “Toda aquela persoa que sinta curiosidade polo xadrez é máis que benvida”. A incorporación de novos socios será determinante para decidir ata onde pode chegar o proxecto. “Os obxectivos dependerán da xente que se una a nós”, recoñecen. A partir dese crecemento pretenden ir planificando clases, actividades formativas e propostas que permitan desenvolver o club.
Entre os colectivos aos que lles gustaría chegar ocupa un lugar especial a xuventude. Polo momento non contan cun programa específico para nenos e mozos, pero é unha das liñas nas que queren avanzar. Consideran que o xadrez pode ofrecer moito máis que unha alternativa de lecer e enumeran entre os seus beneficios o “pensamento crítico, capacidade de planificación e toma de decisións, respecto polo rival e polas regras, disciplina...”.
COMPETICIÓN. A vertente competitiva tamén comeza a asomar nestes primeiros meses de vida. O pasado 5 de setembro, catro integrantes de Pico da Lebre participaron no Torneo Villa de Navia, unha das primeiras experiencias do novo club fóra de Foz. “Os resultados foron bos e estamos animados a seguir participando”, sinalan.
O seguinte paso podería chegar xa o próximo ano. Federarse é un dos principais obxectivos da entidade e, aínda que o prazo correspondente aínda non está aberto, os responsables confían en poder estar federados en 2027. Incluso valoran a posibilidade de dar un salto máis e participar na Liga Galega de Xadrez.
Non obstante, competir non será a única finalidade. O club considera de “importancia capital” a divulgación deste deporte e quere mostrar todo o que pode achegar tanto no plano intelectual como no social. Tamén figura entre os seus plans organizar os seus propios torneos en Foz, aínda que recoñecen que necesitan tempo e preparación antes de asumir ese reto.
A idea é que esas futuras competicións sirvan tamén para abrir o club ao exterior. “Queremos organizar torneos para ter a oportunidade de coñecer xente doutras vilas coa mesma paixón polo xadrez que nós”, explican. Deste xeito, os taboleiros poderían funcionar como punto de conexión entre afeccionados de diferentes lugares e contribuír a incorporar Foz ao circuíto de actividades xadrecísticas.
FACER CLUB. Neste momento, unha das necesidades para seguir avanzando pasa por conseguir un espazo apropiado. Dispoñer dun local permitiríalles establecer horarios, recibir novos socios con maior facilidade e desenvolver actividades que agora resultan máis difíciles de organizar. A entidade acaba de darse de alta e aínda non concretou apoios institucionais, aínda que os seus responsables confían en atopar unha boa resposta. “Estamos seguros de que contaremos cun gran apoio por parte das administracións”, apuntan.
A partir de aí, o crecemento dependerá tamén da resposta dos propios veciños. Non queren deseñar un proxecto pechado de antemán, senón que as persoas que se incorporen contribúan a decidir as actividades, clases e iniciativas que se poñan en marcha. A aspiración é construír unha entidade na que os socios non sexan simplemente xogadores, senón parte activa do seu desenvolvemento.
Neste sentido, a convivencia entre persoas de distintas idades pode converterse nunha das fortalezas de Pico da Lebre. Nun mesmo taboleiro poden competir dúas xeracións separadas por décadas e facelo en igualdade de condicións, compartindo coñecementos e aprendendo mutuamente.
FUTURO. Se hai unha palabra que define estes primeiros meses é ilusión. Os responsables do club son conscientes de que queda practicamente todo por construír: ampliar a base social, atopar un local, federarse, achegarse aos máis novos, preparar actividades e valorar a entrada na competición autonómica. Eles mesmos resumen o momento no que se atopan cunha frase: “Somos un club novo con máis futuro que presente. Pero estamos ilusionados e temos ganas de traballar”.
Ese futuro que imaxinan non está necesariamente medido en trofeos ou resultados deportivos. A primeira aspiración é moito máis sinxela e, ao mesmo tempo, imprescindible para que todo o demais sexa posible. Preguntados por como lles gustaría ver Pico da Lebre dentro duns anos, a resposta é clara: “Gustaríame velo con moitos socios e socias. Iso é o principal e traballaremos por iso”.
Por agora son seis, reúnense polo menos unha vez á semana e van dando forma ao proxecto partida a partida. O taboleiro do Club Xadrez Pico da Lebre acaba de abrirse e en Foz aínda quedan moitas xogadas por facer.