O sector pesqueiro de Celeiro reclama máis vixilancia no porto tras varios danos e posibles furtos
A preocupación medra entre profesionais do sector pesqueiro de Celeiro pola reiteración de incidentes rexistrados nas últimas semanas dentro das instalacións portuarias. Os afectados trasladaron a situación aos entes pesqueiros e reclaman á administración portuaria que estude un reforzo da vixilancia e da seguridade para evitar novos episodios.
Boa parte dos feitos comunicados concentráronse no peirao de baixura, situado xunto á mariña seca e próximo ás instalacións industriais. Segundo explican desde o sector, un buque cerqueiro que ten o seu punto de atraque nesta zona sufriu en diferentes ocasións danos no material de traballo, entre eles a rotura de redes.
A armadora da embarcación sostén que non se trata dun episodio illado. A esta situación engadiuse durante esta mesma fin de semana a desaparición dunha lona de grandes dimensións que se empregaba para cubrir e protexer os aparellos depositados no peirao. Os afectados sinalan que estaba fabricada con material de calidade e que supuxera un desembolso económico considerable.
Desde o sector pesqueiro advirten de que este tipo de sucesos estarían comezando a producirse con certa frecuencia, unha situación que incrementa a inquietude entre os profesionais que deixan embarcacións, aparellos e outros equipos de traballo nas instalacións portuarias.
MÁIS INCIDENTES. As advertencias non se limitan ao peirao de baixura. Tamén se comunicaron posibles furtos no denominado peirao norte, onde, segundo a información trasladada polos profesionais, tería desaparecido diverso material pertencente a embarcacións da frota.
Ante estes feitos, os afectados consideran necesario adoptar medidas preventivas que permitan mellorar o control das diferentes zonas do porto. A súa petición céntrase especialmente no reforzo da vixilancia para protexer tanto as embarcacións como as redes, os aparellos e o resto do material que os profesionais precisan para desenvolver diariamente a súa actividade.
O sector espera agora que a administración portuaria valore a situación e adopte as medidas que considere oportunas para previr novos incidentes e mellorar a seguridade nas instalacións de Celeiro.