O PP ofrece o seu apoio ao PXOM de Barreiros se incorpora unha vía para intentar evitar os derrubos de Lóngara
O Partido Popular de Barreiros abriu a porta a apoiar a aprobación do Plan Xeral de Ordenación Municipal (PXOM) se o documento incorpora unha solución legal e urbanística que poida contribuír a evitar a demolición das seis vivendas de Lóngara afectadas por sentenzas de derrubo.
A formación considera que a prioridade neste momento debe ser explorar todas as posibilidades ao alcance do Concello e evitar que a situación derive nun novo enfrontamento político. "Se existe unha vía legal e urbanística que poida contribuír a evitar que estas familias perdan os seus fogares, o Concello ten a obriga de estudala", sostén o PP, que se mostra disposto a "arrimar o ombreiro" se esa alternativa pasa polo novo planeamento.
SETE ANOS SEN PXOM. Os populares centran boa parte das súas críticas no tempo transcorrido desde a chegada do BNG á Alcaldía en 2019. Segundo defenden, o anterior goberno do PP deixou un PXOM "moi avanzado", con boa parte do traballo técnico realizado e a tramitación encamiñada.
"O actual goberno non herdou unha folla en branco", sinalan, asegurando ademais que o equipo técnico redactor que participaba daquela continúa vinculado ao proceso.
O PP sostén que, despois de sete anos, o Concello debería recuperar e culminar ese documento, especialmente ante a situación das familias de Lóngara. A formación vincula tamén as dificultades históricas do planeamento á intervención urbanística de Barreiros durante o Goberno bipartito de PSOE e BNG na Xunta, unha etapa sobre a que mantén unha visión crítica.
APOIO CON CONDICIÓNS. A oferta dos populares pasa por facilitar a aprobación do PXOM sempre que exista unha fórmula xuridicamente viable que poida incorporarse ao documento e axudar aos propietarios das vivendas.
Neste sentido, reclaman á alcaldesa, Ana Ermida, que "estea á altura" e utilice todas as ferramentas legais e urbanísticas dispoñibles. O PP defende que as familias adquiriron e construíron as súas vivendas de boa fe e considera que deben esgotarse as alternativas antes de chegar á demolición.
"Se o bipartito recupera e culmina o PXOM que recibiu moi avanzado do anterior goberno do PP e existe unha solución legal que poida incorporarse para contribuír a evitar os derrubos de Lóngara, atopará ao Partido Popular disposto a falar, colaborar e apoiar", afirma a formación.
Aínda que asegura que non quere alimentar unha confrontación sobre o pasado, o PP responsabiliza politicamente ao BNG de ter impulsado hai anos a oposición ao desenvolvemento urbanístico de Barreiros. Con todo, insiste en que o obxectivo inmediato debe ser buscar unha saída para as seis familias e reclama ao goberno municipal que acelere o planeamento e estude todas as posibilidades legais.