Fórnea estrea uns accesos renovados á antiga escola tras rematar as obras
O Concello de Trabada vén de rematar as obras de acondicionamento dos accesos á antiga escola de Fórnea, un edificio que actualmente funciona como local social da parroquia. A intervención buscou mellorar a seguridade, a accesibilidade e a funcionalidade dun espazo empregado habitualmente pola veciñanza.
Os traballos, que comezaron nas últimas semanas de agosto, incluíron a retirada da antiga varanda, que presentaba un importante deterioro, e a colocación dunha nova. Ademais, ampliouse a superficie pública situada xunto ao inmoble e formigonouse tanto esta nova zona como o acceso ao edificio.
A actuación executouse ao abeiro dun convenio coa Deputación de Lugo e dá continuidade ás melloras desenvolvidas nos últimos meses en Fórnea. Entre elas figura a renovación do parque infantil da parroquia, onde se substituíron varios elementos de xogo e se actuou sobre o pavimento.
Coa conclusión das obras, o Concello busca que a antiga escola conte cunha contorna máis cómoda e segura para as persoas que participan nas actividades do local social.
O alcalde, Rubén García Freije, destacou que o goberno local continúa traballando para "mellorar os espazos públicos das nosas parroquias" e ofrecer á veciñanza lugares máis seguros e adecuados para o seu uso.
O executivo municipal prevé manter esta liña de actuación con novos proxectos tanto en Fórnea como noutras parroquias de Trabada.