Ferreira do Valadouro prepárase para catro xornadas de festa coa celebración das Festas do Oito
Ferreira do Valadouro xa ten todo preparado para celebrar unha nova edición das Festas do Oito, que este ano concentrarán a súa programación entre o venres 4 e o luns 7 de setembro. Serán catro días de actividade continuada nos que se sucederán as citas gastronómicas, as actuacións musicais, as verbenas e as propostas pensadas para diferentes idades.
A festa comezará o venres cunha das novidades gastronómicas do programa. Ás 21.00 horas servirase unha mexillonada popular gratuíta acompañada de viño tinto e branco. Ás 21.30 horas será a quenda da cea, cun menú composto por paella mixta, costela asada, sobremesa, bebida, café e chupito. A primeira noite completarase coa música da orquestra Gran Parada, JLO El Romántico e a discoteca móbil Conxuro.
O sábado 5 ofrecerá unha programación que se estenderá desde o mediodía ata a madrugada. O grupo folclórico Amado Lar actuará ás 13.00 horas na Praza de Santa María, antes da sesión vermú con D'Kriss. Pola tarde, ás 19.00 horas, celebrarase un tardeo con DJ Lewnar, Somiux, Lucasito e Litainer DJ. A xornada rematará cunha verbena desde as 23.00 horas con D'Kriss e a Discoteca Móbil Alejandro Martínez.
Os actos relixiosos e a música compartirán protagonismo o domingo 6. A Coral Polifónica de Foz acompañará a misa solemne das 12.00 horas e, posteriormente, ás 14.00 horas, actuará a Banda da Escola de Música O Compás do Río Ouro. Eureka animará a sesión vermú das 14.30 horas e regresará ás 22.30 para unha verbena na que tamén participará o Grupo Beatriz.
O último día das celebracións, o luns 7, comezará coa misa solemne cantada polo Coro Río Ouro ás 12.00 horas. Mar de Arousa encargarase da sesión vermú a partir das 14.30 horas, mentres que ás 17.00 horas os nenos e nenas pasarán a ser protagonistas cunha tarde de inchables e festa da escuma.
A música volverá tomar a vila pola noite. Mar de Arousa e a Orquestra Principal subirán ao escenario ás 22.30 horas para pechar unha edición das Festas do Oito que volverá converter Ferreira nun dos puntos de encontro festivos de comezos de setembro na comarca.
POLÉMICA POLAS DATAS. A celebración chega este ano acompañada pola polémica polo cambio das datas tradicionais. O BNG criticou que, por primeira vez, as Festas do Oito deixen sen programación precisamente o 8 de setembro, xornada que dá nome aos festexos, e cuestionou tamén que este ano se trasladase o festivo local ao día 7 en lugar de manter o 9 de setembro. A controversia chegou tamén ao último pleno municipal, no que a Corporación acordou que o 9 de setembro volva ser festivo local en 2027, xunto co martes de Entroido. Deste xeito, a xornada recuperará o próximo ano a súa condición de festivo no municipio, tal e como viña reclamando o grupo nacionalista.