Barreiros acolle a presentación dun receitario da cociña tradicional da Mariña
A gastronomía foi posta de novo no centro como un dos piares fundamentais da identidade dun territorio durante a presentación do Receitario básico da cociña tradicional da Mariña, un volume que se deu a coñecer este luns en Barreiros e que recolle unha ampla mostra da riqueza culinaria deste xeodestino.
A obra nace no marco da colaboración entre a Mancomunidade de Concellos da Mariña Lucense e o Colectivo de Gastronomía da Mariña, dentro do proxecto Turismo Slow Norte de Galicia, e conta tamén co apoio dos convenios anuais en materia turística da Deputación de Lugo e da Xunta de Galicia. O obxectivo principal é poñer en valor as materias primas locais e as elaboracións tradicionais que contribúen a definir unha identidade propia, recoñecible e atractiva para o visitante.
Segundo explicaron durante o acto, o receitario non é un punto de chegada, senón o primeiro paso dunha estratexia máis ampla destinada a documentar, recuperar e difundir o patrimonio culinario da comarca, garantindo que ese coñecemento non se perda co paso do tempo.
No evento participaron a alcaldesa de Barreiros, Ana Ermida; a presidenta da Mancomunidade, Rocío López; representantes do proxecto Turismo Slow Norte de Galicia e do Colectivo de Gastronomía da Mariña, Tita Iglesias e Javier Carreiras; a xefa de área provincial de Turismo da Xunta en Lugo, Paloma Vázquez; e a presidenta da Deputación de Lugo, Carmela López.
Na súa intervención, Rocío López subliñou que esta publicación é froito da cooperación entre entidades e dun modelo de traballo que busca impulsar un turismo sostible, auténtico e centrado na experiencia. Lembrou que o proxecto Turismo Slow Norte de Galicia, iniciado no ano 2015, aposta por un turismo máis humano, respectuoso co territorio e baseado na inmersión na cultura local.
Tamén destacou o papel do Colectivo de Gastronomía da Mariña, pioneiro en Galicia por integrar toda a cadea alimentaria do territorio, desde produtores ata restauradores, hostaleiros e cociñeiros, baixo criterios de sostibilidade e calidade.
Neste sentido, a presidenta sinalou que o receitario simboliza a unión de esforzos e debe entenderse como unha auténtica declaración de identidade, xa que recolle saberes tradicionais, produtos locais e receitas que conectan pasado e presente. “É unha homenaxe ás persoas que manteñen viva a nosa cociña”, apuntou.
O Receitario básico da cociña tradicional da Mariña inclúe tanto pratos populares como elaboracións de restaurante, ademais doutras receitas que forman parte do patrimonio culinario da comarca, moitas delas transmitidas ao longo de xeracións. Todas están ligadas aos produtos do mar, da terra e das hortas da Mariña, así como ás súas tradicións e modos de vida.
A primeira tirada consta de 400 exemplares, que serán distribuídos entre aloxamentos de Turismo Slow Norte de Galicia, membros do Colectivo de Gastronomía, centros de formación como o IES de Foz, establecementos adheridos ao sistema SICTED e os concellos da Mancomunidade, que os poñerán a disposición da cidadanía nas bibliotecas municipais. Tamén se repartirá entre as persoas asistentes ao acto de presentación. Ademais, a publicación estará dispoñible en formato dixital a través da web da Mancomunidade.
Entre as receitas recollidas no volume figuran propostas de recoñecidos profesionais da gastronomía da Mariña, como:
Bonito en escabeche (Mar Orosa, Restaurante El Oviedo)
Salpicón de lumbrigante (Alejandro Balseiro, Restaurante Nito)
Rolo de bonito (Alejandro Balseiro, Restaurante Nito)
Freixós con grelos (Mar Orosa, Restaurante El Oviedo)
Caldeirada de raia (Mar Orosa, Restaurante El Oviedo)
Patacas con longueiróns (Mar Orosa, Restaurante El Oviedo)
Cazola de pescada (Javier Montero, Restaurante Javier Montero)
Fabas con ameixas (Javier Montero, Restaurante Javier Montero)
Enfariñada con torreznos (Felisa Varela, Hotel Restaurante Rías Altas)
Guiso de luras na súa tinta (Alejandro Balseiro, Restaurante Nito)
Empanada de verza e coello estilo Mondoñedo (Isaac Varela, Taberna Galiana)
Bola de roxóns (Isaac Varela, Taberna Galiana)
Compota de peras (Cristina Rodríguez, Marmeladas A Morena)
Bica de Mondoñedo (Isaac Varela, Taberna Galiana)
Rosquillas de Entroido (Felisa Varela, Hotel Restaurante Rías Altas)
Torta de Mondoñedo
En conxunto, trátase dun proxecto que busca non só recompilar receitas, senón tamén reforzar o vínculo entre gastronomía, territorio e identidade cultural da Mariña Lucense.