Asociación de Veciños Santa Eulalia de A Devesa celebra o seu 40º aniversario
A Asociación de Veciños Santa Eulalia da Devesa celebrou os seus 40 anos de historia cun encontro no local social no que a memoria, o agradecemento e a convivencia foron os grandes protagonistas. Baixo o lema 40 anos facendo historia xuntos, numerosos veciños e veciñas reuníronse para lembrar a evolución dunha entidade que durante catro décadas contribuíu a dinamizar a vida social e cultural da parroquia.
Un dos momentos máis especiais da celebración foi a homenaxe a doce persoas maiores de 90 anos residentes na Devesa. A actual directiva quixo recoñecer deste xeito unha xeración que, co seu traballo e experiencia, contribuíu ao desenvolvemento da comunidade e á conservación da súa identidade.
Os homenaxeados recibiron o afecto dos asistentes nun acto que puxo en valor a súa traxectoria vital e o legado transmitido ás xeracións posteriores. A asociación destacou especialmente a sabedoría e o esforzo destas persoas como parte fundamental da historia da parroquia.
O aniversario tamén permitiu botar a vista atrás sobre a propia evolución da entidade. A celebración incluíu un recoñecemento ás diferentes xuntas directivas que estiveron á fronte da asociación ao longo destes 40 anos e que contribuíron, de maneira desinteresada, a garantir a súa continuidade.
A través dos expresidentes fíxose extensivo o agradecemento a todas as persoas que asumiron responsabilidades durante estas décadas, promovendo iniciativas, actividades e proxectos para a veciñanza. Ese traballo permitiu tamén consolidar o local social como un dos principais espazos de encontro e participación da Devesa.
A actual directiva valorou positivamente a resposta da veciñanza á convocatoria e aproveitou a conmemoración para reafirmar a vontade de continuar impulsando iniciativas que favorezan a convivencia e manteñan activa a parroquia.
Tras catro décadas de percorrido, a Asociación de Veciños Santa Eulalia da Devesa afronta así unha nova etapa coa intención de preservar o espírito comunitario que marcou a súa creación e de seguir construíndo, coa participación da veciñanza, o futuro da parroquia.