As familias dos seis chalés de Barreiros mobilízanse baixo o lema "Hai solución sen demolición"
As familias afectadas pola orde de derruba dos seis chalés de Barreiros, volverán levar este venres, 28 de agosto, a súa reivindicación á rúa. A concentración comezará ás 18.00 horas diante da Casa do Concello e pretende visibilizar a situación dos propietarios e conseguir novos apoios na procura dunha alternativa que permita evitar a demolición das súas vivendas.
Os afectados acudirán á mobilización cunha nova mensaxe coa que queren resumir a súa principal reivindicación: "Hai solución sen demolición". A esta engaden unha segunda idea: "As administracións deben traballar unidas a favor de quen fai ben as cousas". Os afectados levan semanas explicando que construíron as vivendas amparados polas licenzas e autorizacións administrativas das que dispoñían.
As familias insisten en que a protesta non pretende dirixirse exclusivamente contra o Concello de Barreiros. Aínda que consideran que neste momento o goberno local ten un papel fundamental pola situación na que se atopa a tramitación do PXOM, lembran que no conflito interveñen tamén outras institucións e organismos, entre eles a Xunta de Galicia, a Axencia de Protección da Legalidade Urbanística (APLU) e os órganos xudiciais.
"Non é un ataque ao Concello exclusivamente", explican os propietarios, que consideran necesario que as diferentes administracións implicadas colaboren para intentar atopar unha solución. "As administracións teñen que traballar xuntas para resolver o que os cidadáns fixeron ben, seguindo as súas normas", sosteñen.
Precisamente, unha das principais reivindicacións das familias durante as últimas semanas foi axilizar a tramitación do PXOM para intentar evitar a derruba. Os afectados defenden que construíron as súas vivendas confiando nas licenzas concedidas pola Administración municipal e consideran que o avance do novo planeamento podería permitir explorar unha eventual vía de legalización antes de que a demolición sexa irreversible.
Os propietarios veñen denunciando tamén que o procedemento avanza a "dúas velocidades": ao seu xuízo, os trámites para executar a demolición progresan con maior rapidez que os destinados a avanzar no planeamento urbanístico.
A concentración contará ademais cunha rolda de prensa na que as familias explicarán a súa situación e abordarán algunhas das cuestións que rodean o procedemento. Segundo avanzan, participará tamén unha persoa que colaborou con elas e que poderá axudar a aclarar diferentes aspectos do conflito, incidindo en que se trata dunha intervención "non partidista".
A mobilización chega nun momento decisivo para os propietarios. As familias xa anunciaron que esixirán unha orde xudicial para permitir o acceso ás vivendas se finalmente continúa adiante a execución da derruba. Tamén solicitarán máis tempo para retirar as súas pertenzas no caso de que se esgoten as posibilidades de conservar os inmobles.
Con todo, os afectados manteñen que o seu principal obxectivo segue sendo atopar unha alternativa antes de chegar a ese escenario. Por iso, fan un chamamento á participación na concentración deste venres. "Pedimos a todo o que poida que veña para darnos o seu apoio", sinalan.