Xove mellora a senda entre Vilachá e o miradoiro de Punta da Mansa
A senda que conecta o núcleo rural de Vilachá, na parroquia de Portocelo, co miradoiro de Punta da Mansa, conta xa cunha mellor condición para o tránsito tras as obras de acondicionamento executadas con apoio económico da Xunta. A actuación contou cunha achega de 17.200 euros por parte do Goberno galego ao Concello de Xove.
O delegado territorial da Xunta en Lugo, Alfonso Villares, comprobou o resultado dos traballos, que permitiron actuar sobre unha infraestrutura que presentaba un importante deterioro e mellorar o seu estado de conservación.
As obras incluíron a limpeza das cunetas e o acondicionamento dos camiños e das conexións da senda. Para mellorar a superficie aplicouse unha capa de saburra natural compactada, coa finalidade de recuperar o percorrido e facilitar a comunicación co núcleo de Vilachá.
A actuación tamén contribúe a favorecer o aproveitamento do miradoiro de Punta da Mansa, considerado un dos enclaves naturais destacados dentro das zonas verdes e espazos de lecer do municipio. A mellora da senda permite acceder a este punto e facilita unha conexión máis segura co núcleo rural.
Segundo explicou Villares, os traballos recibiron o apoio da Consellería de Medio Ambiente e Cambio Climático ao abeiro da orde de axudas deste ano destinada a financiar actuacións de fomento das zonas verdes. Estas subvencións buscan impulsar espazos que poidan funcionar como refuxio climático e contribuír á conservación da biodiversidade.
A convocatoria tamén contempla actuacións destinadas a reforzar a conectividade natural entre os ámbitos urbanos e periurbanos, un obxectivo ao que se vincula a mellora realizada neste percorrido de Xove.