Xove converterase este domingo na capital da ximnasia rítmica coa celebración do seu torneo anual
O pavillón de Xove volverá encherse de cor, música e deporte este domingo 17 de maio coa celebración do XXXI Torneo Concello de Xove de ximnasia rítmica, unha cita xa consolidada no calendario deportivo da provincia e que reunirá arredor de 700 ximnastas chegadas desde diferentes puntos de Lugo.
A competición desenvolverase ao longo de toda a xornada e contará coa participación de deportistas de distintas categorías e niveis, convertendo o municipio nun referente da ximnasia rítmica durante toda a fin de semana. A sesión da mañá, que dará comezo ás 10:30 horas, estará dedicada ás categorías de Nivel B, Promoción e Prebase, mentres que pola tarde, a partir das 16:30 horas, será a quenda do Nivel Escolar.
Desde a organización destacan a importancia dun evento que cada ano consegue mobilizar a centos de familias, adestradores e afeccionados, xerando ademais un importante ambiente de convivencia arredor do deporte base. O torneo supón tamén unha oportunidade para visibilizar o traballo realizado polos clubs e polas ximnastas ao longo da tempada.
A celebración desta trixésimo primeira edición conta co apoio do Concello de Xove, ademais da implicación de numerosas familias e persoas colaboradoras que fan posible a organización dunha cita deportiva destas dimensións. O evento consolidouse co paso dos anos como un dos encontros máis multitudinarios da ximnasia rítmica na provincia.
A previsión é que o pavillón rexistre unha gran afluencia de público durante todo o día, nunha xornada marcada pola ilusión das participantes e pola exhibición de talento, coordinación e esforzo sobre o tapiz.