Viveiro reunirá coches e motos clásicas nunha xornada con ruta turística e gastronomía
Os amantes do motor clásico volverán ter unha cita en Viveiro o vindeiro sábado 12 de setembro coa celebración da IV Xuntanza de Coches e Motos Clásicas. A iniciativa reunirá vehículos de diferentes épocas nunha xornada que combinará a afección polo automobilismo con turismo, gastronomía e convivencia entre os participantes.
O punto de encontro estará situado no aparcadoiro dos Castelos, en Covas, onde ás 10.00 horas comezará a recepción dos asistentes e a inscrición para participar na ruta.
A partir das 12.00 horas, aproximadamente, os vehículos tomarán a estrada para realizar un percorrido turístico pola zona. Tras completar a ruta, a programación continuará cunha sesión vermú acompañada de petiscos.
A xornada prolongarase ás 15.00 horas cunha comida de confraternidade. O prezo establecido é de 35 euros para os adultos e de 20 euros para os participantes de entre 6 e 12 anos, mentres que os menores de ata 6 anos poderán asistir gratuitamente. As prazas para a comida son limitadas.
Ademais, a organización entregará ás persoas inscritas un sombreiro de recordo xunto con outras sorpresas preparadas para a ocasión.
O prazo para anotarse permanecerá aberto ata o 8 de setembro. As inscricións poden formalizarse a través dos teléfonos habilitados pola organización: 650 652 073, correspondente a David, e 699 249 738, de Sandra.
A IV Xuntanza dá continuidade así a unha proposta que busca reunir aos afeccionados aos coches e motos clásicos e ofrecerlles unha xornada na que compartir a súa paixón polos vehículos históricos, ao tempo que percorren e desfrutan da contorna de Viveiro.