Viveiro proxecta unha nova glorieta entre a LU-862 e a LU-539
Viveiro avanza cara á remodelación da intersección entre as estradas autonómicas LU-862 e LU-539, unha actuación coa que se pretende mellorar a seguridade viaria e ordenar a circulación nun dos puntos de conexión do núcleo urbano. O Consello do Goberno autonómico deu luz verde á aprobación provisional do proxecto, que suporá un investimento estimado de arredor de 950.000 euros.
A intervención contempla a transformación da actual intersección de circulación rotatoria elíptica nunha glorieta circular, unha nova configuración coa que se busca ordenar os xiros, reducir a velocidade dos vehículos nas entradas e mellorar tanto a capacidade como a seguridade do tráfico.
O ámbito de actuación atópase na costa oeste da ría de Viveiro, nunha zona urbana na que conviven edificios residenciais e comerciais con equipamentos educativos e sanitarios. Nas proximidades localízase tamén o Pazo da Misericordia, un elemento catalogado que se terá en conta durante o desenvolvemento do proxecto.
Ademais da ampliación e remodelación da rotonda na confluencia da LU-862 e a LU-539, os traballos incluirán a urbanización das catro vías de aproximación á intersección. A actuación servirá igualmente para renovar un firme deteriorado e corrixir as condicións xeométricas do trazado actual.
O proxecto pretende tamén dar continuidade ás beirarrúas e aos servizos xa existentes, mellorando a conexión peonil e a integración da intersección no tecido urbano. O obxectivo, segundo se recolle na actuación, é incrementar a funcionalidade e a visibilidade neste punto e conseguir unha circulación máis ordenada.
SEN EXPROPIACIÓNS
A Consellería de Vivenda e Planificación de Infraestruturas prevé someter o proxecto a información pública este mesmo mes de setembro, durante un período de 30 días hábiles a partir do día seguinte ao da publicación do correspondente anuncio.
A actuación non requirirá tramitar expedientes de expropiación, xa que as obras previstas se desenvolverán integramente sobre terreos de dominio público. O ámbito afecta ás estradas autonómicas, á rúa Viveiro e a espazos pertencentes ao Dominio Público Marítimo-Terrestre.
Ao tratarse de terreos dependentes de diferentes administracións públicas, antes de iniciar os traballos será necesario obter os correspondentes permisos de ocupación dos organismos titulares.
Superado o período de información pública e resoltas as posibles alegacións, procederase á aprobación definitiva do proxecto de construción. A previsión é licitar as obras ao longo do próximo ano y, unha vez adxudicadas, o prazo estimado para a súa execución será de seis meses.
A actuación busca así renovar unha intersección urbana na que conflúen dúas estradas autonómicas e adaptar o seu deseño ás necesidades actuais de circulación, reforzando ao mesmo tempo a seguridade de vehículos e peóns.