Viveiro obtén case 95.000 euros para renovar infraestruturas no parque empresarial de Landrove
O Concello de Viveiro contará cunha achega de 94.646,56 euros da Consellería de Economía e Industria para executar diversas melloras no parque empresarial de Landrove. A subvención foi concedida dentro da convocatoria autonómica destinada á habilitación e modernización de infraestruturas nos parques empresariais galegos correspondente ao exercicio 2026.
O proxecto aprobado supón un investimento subvencionable de 118.308,20 euros e contará cun financiamento do 80 %, permitindo acometer actuacións orientadas a reforzar a funcionalidade e a seguridade deste espazo industrial situado nas parroquias de Landrove e Galdo.
A iniciativa responde á necesidade de actualizar distintas infraestruturas que presentan un deterioro progresivo derivado do paso do tempo e do uso continuado das instalacións. Entre os elementos que precisan intervención figuran varios accesos viarios, a sinalización, os sistemas de protección contra incendios, a rede de evacuación de augas pluviais, os pasos de peóns adaptados e os soportes dos colectores de residuos.
As obras previstas inclúen a reparación e acondicionamento de dúas vías de acceso ao polígono, a renovación da sinalización horizontal e vertical e a instalación de hidrantes contra incendios debidamente identificados. Ademais, ampliarase a rede de sumidoiros e colocaranse novas rígolas de formigón para optimizar a recollida e drenaxe das augas pluviais.
O proxecto tamén contempla a reparación do pavimento podotáctil existente nos pasos de peóns, co obxectivo de mellorar a accesibilidade, así como a substitución dos sistemas de suxeición dos colectores por novos elementos de aceiro inoxidable que incrementarán a súa durabilidade.
A intervención desenvolverase ao longo de aproximadamente 332 metros de vías e contará cun prazo de execución estimado de tres meses. O obxectivo é reforzar as condicións de seguridade, accesibilidade e servizo do parque empresarial, contribuíndo ao mesmo tempo a aumentar a súa capacidade para atraer e consolidar actividade económica.
Desde o Concello de Viveiro valoran favorablemente a concesión desta axuda, ao considerar que permitirá continuar avanzando na modernización dun espazo estratéxico para o tecido empresarial do municipio e mellorar as condicións das empresas que desenvolven a súa actividade no parque empresarial de Landrove.