Viveiro mellorará os accesos ao monte San Roque cun investimento de preto de 122.000 euros
Os accesos ao monte San Roque, un dos espazos naturais, turísticos e de lecer máis frecuentados de Viveiro, serán obxecto dunha actuación de acondicionamento destinada a mellorar tanto as vías como as infraestruturas existentes na zona.
O proxecto impulsado polo Concello de Viveiro conta cun orzamento de 121.970,95 euros e coa colaboración da Axencia de Turismo de Galicia, que achegará ata 100.000 euros para financiar a intervención.
Os traballos abranguerán diferentes ámbitos. Entre as principais actuacións previstas figura a mellora do firme das vías e dos accesos peonís, así como a renovación das redes de saneamento e abastecemento.
O proxecto contempla tamén a instalación dunha nova rede de recollida de augas pluviais, ademais de actuacións destinadas a reforzar a sinalización e facilitar a accesibilidade neste espazo.
A seguridade será outro dos eixos da intervención. Neste sentido, está prevista a colocación de novas varandas e outros elementos de protección nos accesos ao monte San Roque.
Os traballos completaranse co acondicionamento da propia zona de entrada, onde se levarán a cabo labores que incluirán a retirada e posterior plantación de novas árbores.
Con esta intervención búscase mellorar a conexión e as condicións de acceso ao monte San Roque, reforzando ao mesmo tempo a conservación e posta en valor dun dos principais puntos de referencia paisaxísticos e turísticos do municipio.
A actuación enmárcase na colaboración entre o Concello de Viveiro e o Goberno autonómico, a través da Axencia de Turismo de Galicia, para avanzar cara a espazos turísticos máis accesibles, seguros e sostibles.