Viveiro contará con oito novas vivendas públicas tras a rehabilitación da Casa dos Mestres

AMariñaXa
A actuación permitirá habilitar oito pisos de promoción pública con protección permanente e un local destinado a usos municipais, cun investimento estimado de 2,2 millóns
viveiro-casa-mestre-irmans-vilar-ponte
17 Nov 2026

O Consello da Xunta autorizou a licitación do contrato para redactar o proxecto e dirixir as obras de rehabilitación da Casa dos Mestres de Viveiro, un inmoble que será transformado en oito vivendas de promoción pública e un espazo para servizos municipais.

O contrato, que conta cun orzamento de licitación de 146.238 euros, comprende tanto a elaboración do proxecto técnico como a dirección dos futuros traballos. O investimento previsto para executar a rehabilitación do edificio ascende a 2,2 millóns de euros.

A Casa dos Mestres está situada na confluencia das rúas Irmáns Vilar Ponte, número 40, e Constanza de Castro, número 32. O inmoble foi cedido polo Concello de Viveiro á Administración autonómica para que poida acometer a súa recuperación e destinalo a vivenda pública.

As oito unidades residenciais resultantes terán a cualificación de vivendas de promoción pública con protección permanente. Ademais, a intervención permitirá habilitar un local que quedará reservado para usos municipais.

Con esta actuación, a Xunta prevé recuperar un edificio existente para ampliar o parque de vivenda pública en Viveiro e incorporar un novo espazo ao servizo do Concello.

0.16253995895386