Viveiro celebrará o Magosto o 31 de outubro con obradoiros, música tradicional e castañas
Viveiro celebrará o sábado 31 de outubro o seu Magosto cunha programación que combinará tradición, artesanía e música na praciña da Herba. O Colectivo Pensamento e Sementeira está detrás desta iniciativa, que busca reunir a veciñanza arredor das castañas e das actividades propias do outono.
A xornada incluirá dous obradoiros con prazas limitadas e inscrición previa. O primeiro será o de cerámica, que se desenvolverá entre as 17.00 e as 21.00 horas e permitirá ás persoas participantes experimentar coa arxila e crear as súas propias pezas co asesoramento dunha profesional.
A segunda proposta estará dirixida ao público infantil. O obradoiro de zonchos celebrarase de 19.30 a 20.30 horas e consistirá na elaboración de colares con estes elementos tradicionais. Para participar en calquera dos dous talleres será necesario cubrir previamente os formularios de inscrición correspondentes.
A música tradicional tamén terá un papel destacado na celebración, con actuacións de diferentes grupos a partir das 21.00 horas. Ademais, durante a xornada repartirán castañas asadas ata esgotar as existencias.
Con esta programación, o Colectivo Pensamento e Sementeira propón unha cita para gozar do outono en Viveiro a través da artesanía, a música e unha das tradicións máis características destas datas.