Viveiro acollerá mañá a VI Concentración de Escolas de Rugby
![Rugby asterix viveiro concetracion](https://amarinaxa.com/wp-content/uploads/2023/02/Rugby-asterix-viveiro-concetracion.jpg)
O Concello de Viveiro acollerá este sábado 25 a VI Concentración de Escolas de Rugby que terá lugar no campo Marcos Gómez, O Cembedo.
A Escola Asterix A Chabola organiza a sexta edición deste encontro para as categorías M6, M8, M10 e M12 que conta un ano máis coa colaboración do concello.
“Dende o goberno local sempre fomentamos o deporte, en especial o deporte entre os máis cativos. Son moitas as veces que felicitamos á Escola Asterix A Chabola polos seus éxitos nas competicións, pero estamos moi orgullosos tamén polo seu labor na promoción do deporte de base”, subliña a alcaldesa María Loureiro.
A xornada desta VI Concentración de Escolas de Rugby prevé a disputa de encontros en catro zonas de xogo de forma simultánea entre as 11.00 e as 15.00 horas.
Ata Viveiro achegaranse as grandes canteiras do rugby galego representadas polo Club Rugby Fendetestas, Os Ingleses, CRAT A Coruña, Capóns Vilalba Rugby Club, Asociación Valentes, CD Zalaeta Rugby, Club Rugby Ferrol, Mareantes Rugby Club Pontevedra, Pontevedra RC, Vigo Rugby, Muralla RC Lugo e o Clube Rugby Coreti Lalín.
Pódese descargar o dossier da concentración de rugby no seguinte enlace.
![1 Rugby asterix viveiro concetracion](https://amarinaxa.com/wp-content/uploads/thumbs/2023/02/1-Rugby-asterix-viveiro-concetracion-200x104.jpg)