Medio ambiente

As queixas polo estado do leito coinciden coa instalación de 12 paneis informativos para advertir dos perigos asociados ás posibles inundacións do Masma

A instalación de novos paneis para informar sobre o risco de inundación en Mondoñedo contrasta, segundo denuncian veciños, co estado que presentan algúns tramos dos ríos do municipio. As queixas céntranse, entre outros puntos, no percorrido entre Muíños e San Lázaro, onde advirten da presenza de abundante maleza no leito.

"Moito cartel con información, pero esta é a situación dalgúns ríos en Mondoñedo", sinalan os veciños, que reclaman unha maior atención á limpeza e ao mantemento destas zonas. Segundo explican, a situación empeora río arriba, onde a vexetación é aínda máis abundante.

As críticas prodúcense precisamente cando se vén de reforzar a información á cidadanía sobre o perigo de desbordamentos coa colocación de 12 novos paneis en diferentes puntos identificados como zonas de risco. A sinalización pretende explicar os perigos asociados aos episodios de precipitacións intensas e ofrecer recomendacións sobre como actuar ante unha eventual inundación.

Unha zona considerada de elevado risco

O río Masma ao seu paso por Mondoñedo figura no grupo IV do Plan de Xestión do Risco de Inundación (PXRI) da Demarcación Hidrográfica Galicia-Costa. Nesta categoría inclúense áreas fluviais consideradas de maior perigosidade e risco ante a posibilidade de desbordamentos.

Os novos carteis forman parte do Plan estratéxico de divulgación das áreas de risco potencial significativo de inundación (Pedarpsi) e inclúen información preventiva e pautas de actuación ante episodios adversos. A intervención, executada pola Consellería de Medio Ambiente e Cambio Climático a través de Augas de Galicia, supuxo un investimento de 4.635 euros.

Con todo, os veciños consideran que a información debe ir acompañada dun adecuado mantemento dos cursos fluviais e poñen como exemplo o tramo entre Muíños e San Lázaro. As súas críticas apuntan á presenza de maleza no leito e reclaman actuacións que permitan mellorar o estado desta zona.

A situación abre así o debate entre as medidas destinadas a informar e concienciar sobre o risco de inundación e as demandas veciñais para que se preste tamén atención ao estado dos ríos nun municipio no que determinadas áreas están catalogadas como especialmente sensibles ante posibles desbordamentos.