Mondoñedo reforza a seguridade fronte ao risco de inundación no río Masma con 12 novos paneis informativos
Mondoñedo reforza a prevención e a seguridade da súa cidadanía ante o risco de inundación no río Masma coa instalación de 12 novos paneis informativos en diferentes puntos identificados como zonas con perigo de desbordamento. A sinalización busca ofrecer á poboación información sobre os riscos asociados aos episodios de chuvia intensa, así como sobre as medidas preventivas e as pautas de actuación recomendadas nestas situacións.
A actuación permitirá mellorar a concienciación pública sobre o comportamento natural dos ríos e facilitará que a veciñanza e as persoas que frecuentan estas zonas coñezan con antelación os posibles perigos e como actuar ante un episodio de inundación. Deste xeito, Mondoñedo incorpora novos elementos de información e prevención nunha contorna especialmente sensible polo risco asociado ao río Masma.
Segundo o Plan de Xestión de Risco de Inundación (PXRI) da Demarcación Hidrográfica Galicia-Costa, a zona do río Masma ao seu paso polo municipio está incluída no grupo IV, no que se integran as áreas fluviais consideradas de maior perigosidade e risco pola posibilidade de que se produzan desbordamentos.
A colocación dos paneis pretende, precisamente, reforzar a protección da cidadanía mediante unha maior información sobre a dinámica dos ríos e sobre as actuacións que se deben adoptar en caso de chuvias intensas. A sinalización inclúe indicacións relacionadas coa prevención e coa resposta ante posibles episodios de inundación nas áreas de risco potencial significativo de inundación (Arpsi).
Os traballos forman parte do Plan estratéxico de divulgación das áreas de risco potencial significativo de inundación (Pedarpsi), unha iniciativa que contempla a instalación deste tipo de elementos informativos en diferentes puntos sensibles da Demarcación Hidrográfica Galicia-Costa.
No caso de Mondoñedo, a instalación dos 12 carteis na contorna do río Masma supuxo un investimento de 4.635 euros e desenvolveuse no marco do contrato para a prestación do servizo de concienciación e divulgación do risco de inundación e de sinalización das áreas que presentan esta situación.
A actuación foi realizada pola Consellería de Medio Ambiente e Cambio Climático, a través de Augas de Galicia.