Unha vintena de nenos e nenas participan no Curso de Verán de Pádel
O Curso de Verán de Pádel chega ao seu remate despois de dous meses de actividade na pista municipal, onde arredor de 20 nenos e nenas tiveron a oportunidade de achegarse a esta disciplina deportiva durante as vacacións estivais.
As sesións desenvolvéronse ao longo dos meses de xullo e agosto e permitiron que os participantes se iniciasen no pádel ou continuasen perfeccionando a súa técnica. Ademais da aprendizaxe deportiva, a proposta buscou fomentar o exercicio físico e ofrecer aos máis pequenos unha alternativa de lecer activo durante o verán.
Ao longo das diferentes xornadas, os rapaces e rapazas puideron adquirir novas habilidades e practicar este deporte nun ambiente lúdico, combinando a formación coa diversión e a convivencia.
Desde a organización valoran positivamente a participación acadada nesta edición e agradecen tanto a implicación dos nenos e nenas como a confianza e o apoio das súas familias.
A iniciativa forma parte das propostas destinadas a fomentar a práctica deportiva entre a infancia e a ampliar as alternativas de ocio durante os meses estivais.
O Curso de Verán de Pádel foi organizado polas Concellerías de Xuventude e Deporte e pola Oficina de Información Xuvenil.