UCIN denuncia o "abandono" de espazos públicos na parroquia de Couxela, en Ribadeo
UCIN (Unión de Ciudadanos Independientes) denuncia o que cualifica como unha situación de "abandono" en diferentes espazos públicos da parroquia de Couxela, en Ribadeo, e responsabiliza ao goberno municipal do PP da falta de conservación destas zonas.
A formación acompaña as súas críticas con fotografías tomadas en distintos puntos da parroquia nas que, segundo explica, pode apreciarse a presenza de herba alta e fentos, así como diferentes instalacións que precisarían labores de limpeza e mantemento.
Entre os lugares sinalados por UCIN figuran o campo de fútbol, un parque infantil e unha zona destinada ao exercicio das persoas maiores. A formación tamén chama a atención sobre a situación das marxes das vías, con cunetas e beiravías cubertas pola vexetación.
Segundo denuncia o partido, a maleza chegou a medrar ata dificultar a visibilidade dalgúns contedores. UCIN considera que estas imaxes evidencian unha falta de atención aos espazos públicos da parroquia e espera que a súa denuncia leve aos responsables municipais a adoptar medidas para mellorar a situación.
Advirten de problemas nas cunetas cando cheguen as chuvias
Un dos aspectos que máis preocupa á formación é o estado da drenaxe das estradas. UCIN asegura que algunhas cunetas están cubertas pola vexetación e advirte de que determinados tubos de drenaxe ou taxeas poderían ter dificultades para evacuar correctamente a auga cando se produzan precipitacións.
Por este motivo, reclama que se acometan tarefas de roza, limpeza e conservación antes da chegada dos períodos de maiores chuvias, tanto para recuperar os espazos afectados como para evitar posibles problemas coa circulación da auga.
UCIN dirixe as críticas ao executivo local presidido polo alcalde Dani Vega e confía en que a denuncia pública sirva para que o Concello revise o estado dos diferentes puntos sinalados en Couxela e acometa as actuacións que sexan necesarias.