Trabada prepárase para unha VII Festa da Enfariñada chea de novidades e sabor tradicional
Trabada xa se prepara para acoller unha nova edición da súa Festa da Enfariñada, que este ano alcanza a sétima convocatoria consolidándose como unha das citas máis destacadas do calendario festivo e gastronómico da comarca. A celebración terá lugar o domingo 3 de maio, a partir das 12.00 horas, na explanada situada fronte ao parque da rúa San Roque.
Un dos momentos centrais da xornada volverá ser a elaboración en directo da enfariñada, na que participarán máis de 40 veciños e veciñas, convertendo o evento nun auténtico escaparate da tradición culinaria local. Esta actividade non só permite poñer en valor un prato moi vencellado á identidade do municipio, senón que tamén fomenta a participación e a convivencia entre a veciñanza e as persoas visitantes.
Nesta edición, a festa incorpora novas propostas que amplían a súa oferta sen perder a esencia. Entre elas destaca a introdución dunha enfariñada con bonito de Burela, que se suma á versión tradicional. Ademais, tamén haberá opcións sen glute, co obxectivo de facer a cita máis inclusiva e accesible para todos os públicos.
A programación completarase con degustacións de produtos típicos, como racións de xamón cocido e chourizo, así como coa presenza das fiolleiras de Muimenta, que achegarán un toque doce á xornada. Tampouco faltará un mercado de produtos artesanais e de proximidade, que permitirá dar visibilidade ao traballo de produtores locais.
No apartado musical, a festa contará coas actuacións de Mestura de Nete, Grupo Lume e a Orquestra Marbella, encargados de animar unha xornada que mestura gastronomía, tradición e lecer.
O alcalde de Trabada, Rubén García Freije, puxo en valor o crecemento desta celebración, que combina tradición, participación e ambiente festivo, tres factores que explican o seu éxito ano tras ano. Co cartel xa presentado, o municipio ultima os preparativos para unha nova edición que aspira a seguir sumando público e reforzando o valor das súas raíces.