Trabada amplía o seu parque de alugueiro social coa entrega dunha nova vivenda en Valboa
O Concello de Trabada vén de sumar unha nova vivenda ao seu programa municipal de alugueiro social coa entrega das chaves dun inmoble habilitado na antiga escola de mestres da parroquia de Valboa. O alcalde, Rubén García, formalizou a sinatura do contrato e destacou a importancia dunha iniciativa que combina a recuperación do patrimonio público coa creación de oportunidades residenciais accesibles.
A vivenda de Valboa convértese na quinta que entra en funcionamento dentro deste proxecto municipal, despois das actuacións realizadas nas antigas escolas de Vidal, Vilapercide, Trabadela e Sante. O obxectivo é dar unha nova utilidade a edificios históricos que durante décadas formaron parte da vida das parroquias e que agora atopan un novo uso ao servizo da veciñanza.
O inmoble contará cun alugueiro social duns 140 euros mensuais, unha medida coa que o Concello busca ofrecer alternativas asequibles nun contexto marcado polo aumento dos prezos e pola escaseza de vivenda dispoñible.
Rubén García subliñou que este programa permite recuperar espazos municipais en desuso e contribuír ao mesmo tempo a afrontar os desafíos demográficos que afectan ao rural. Neste sentido, avanzou que o Concello continuará rehabilitando outras antigas escolas para seguir ampliando a oferta de vivenda pública.
O rexedor anunciou ademais que nas próximas semanas se dará a coñecer un novo plan de vivenda para o municipio, co propósito de reforzar as políticas destinadas a facilitar o acceso a un fogar e favorecer a fixación de poboación en Trabada.