Saúde Mental A Mariña pecha en San Cibrao o proxecto "Conecta co mar. O mar é vida"
A Asociación Saúde Mental A Mariña pon o punto final ao proxecto "Conecta co mar. O mar é vida", unha iniciativa desenvolvida desde 2024 que empregou o mar e o patrimonio marítimo-pesqueiro como ferramentas para favorecer o benestar, a participación social e o coidado da saúde mental.
Como peche desta etapa, a Casa da Cultura de San Cibrao acollerá unha exposición do 1 ao 15 de outubro. A inauguración da mostra será o xoves 1 de outubro, ás 12:30 horas, e permitirá coñecer parte das experiencias e creacións realizadas ao longo do proxecto.
A proposta parte dunha visión do mar que vai máis alá da súa dimensión paisaxística ou patrimonial. Ao longo da iniciativa, o medio marítimo foi entendido tamén como un espazo de encontro, acompañamento e coidado, procurando fortalecer os vínculos entre as persoas e as redes de apoio social.
O proxecto incorporou igualmente unha perspectiva vinculada á prevención da conduta suicida, mediante o reforzo destas redes e dos lazos comunitarios. A exposición permitirá compartir parte do traballo realizado durante estes anos con todas aquelas persoas que se acheguen á mostra.
Tras a súa estancia en San Cibrao, a exposición trasladarase a Ribadeo. A Oficina de Turismo da localidade acollerá a mostra do 19 de outubro ao 15 de novembro, dando continuidade a este espazo de divulgación e encontro.
Con esta última etapa, "Conecta co mar. O mar é vida" pecha o percorrido iniciado en 2024 coa intención de seguir explorando as posibilidades que ofrece o mar como elemento para coidar, conectar e xerar benestar.