San Cibrao convoca unha concentración para reclamar a recuperación da atención pediátrica
A Plataforma Sanitaria da Mariña convoca unha concentración este mércores 4 de novembro, ás 11.00 horas, diante do centro de saúde de San Cibrao para reclamar a recuperación da atención pediátrica. A mobilización pretende denunciar a falta continuada deste servizo, que afecta tanto a esta localidade como a Xove desde hai case un mes.
Baixo a mensaxe "Nin un só día sen pediatría", o colectivo chama á participación da veciñanza para esixir unha solución que garanta a asistencia sanitaria dos nenos e nenas. A ausencia dunha profesional está a provocar que as familias non dispoñan de atención pediátrica ordinaria nin dun seguimento continuado da saúde dos menores. Segundo denuncia a plataforma, tamén se están aprazando sen unha data definida controis e revisións do desenvolvemento infantil, ademais de dificultarse a atención de doenzas habituais.
A situación xa motivou unha concentración diante do centro de saúde de Xove, convocada tamén pola Plataforma Sanitaria da Mariña. Naquela mobilización, as familias reclamaron a recuperación dunha asistencia pediátrica estable nos dous municipios.
A alternativa ofrecida pola Xerencia da área sanitaria consiste en derivar os casos urxentes ao centro de saúde de Burela ou ao seu Punto de Atención Continuada. Porén, a plataforma considera insuficiente esta resposta, xa que o centro burelés tamén sofre falta de persoal e conta unicamente coa metade da súa dotación de pediatras.
A problemática esténdese a Xove porque ambos os municipios comparten a profesional encargada deste servizo. A coordinadora da plataforma, Montse Porteiro, criticou a actuación da Xerencia e da Consellería de Sanidade e cuestionou as explicacións ofrecidas sobre a cobertura asistencial. Tamén considera que a atención das crianzas por parte de pediatras do hospital non resolve a situación, especialmente polas dificultades de persoal que atravesa ese servizo.
O malestar veciñal quedou patente tamén na concentración na que arredor dun cento de familias reclamaron en Xove a cobertura da praza de pediatría. Pola súa banda, o PSOE de Xove tamén pediu cubrir a vacante para garantir a atención sanitaria á infancia.
O colectivo reclama explicacións e medidas efectivas para recuperar a asistencia e anima a toda a cidadanía da Mariña a participar na protesta, teña ou non fillos, ao entender que a perda de servizos sanitarios afecta ao conxunto da comarca.