Ribadeo reunirá a máis de 400 futbolistas no III Torneo Internacional Cadete
Ribadeo volverá situarse no mapa do fútbol formativo coa celebración do III Torneo Internacional de Fútbol Base Cadete, unha competición que reunirá os días 30 e 31 de maio a 24 equipos procedentes de diferentes puntos da Península Ibérica e tamén do Reino Unido. A cita, organizada pola SD Ribadeo, congregará a un total de 430 xogadores e xogadoras, aos que se sumarán familiares e acompañantes, xerando un importante movemento deportivo e social no municipio.
O campionato contará coa participación de conxuntos chegados de Galicia, Asturias, Cantabria e Castela e León, ademais dunha escuadra portuguesa e outra inglesa, reforzando así o carácter internacional dun evento que continúa medrando edición tras edición.
A competición desenvolverase ao longo de dúas xornadas. Durante o sábado disputaranse os encontros correspondentes á fase de grupos, mentres que o domingo será a quenda das eliminatorias directas, con partidos de oitavos de final, cuartos, semifinais e a gran final que decidirá o equipo campión.
Desde a organización destacan que o torneo busca ofrecer unha experiencia deportiva de calidade para os participantes, ao tempo que fomenta a convivencia entre clubs e deportistas de diferentes territorios. O evento converteuse xa nunha das citas destacadas do calendario de fútbol base do norte peninsular.
Na presentación do torneo, o alcalde de Ribadeo, Dani Vega, puxo en valor a colaboración institucional para facer posible este tipo de iniciativas e salientou a súa repercusión máis alá do ámbito deportivo. O rexedor indicou que estes campionatos contribúen a dinamizar a actividade económica local nun momento previo ao inicio da tempada estival e permiten dar a coñecer o municipio a centos de visitantes.
Na mesma liña pronunciouse a presidenta de Acisa, Carmen Cruzado, quen destacou a importancia destas fins de semana para sectores como a hostalería, os establecementos hoteleiros e o comercio local. Segundo sinalou, a chegada de equipos e acompañantes supón un impulso significativo para a economía ribadense nun período clave antes do verán.
Pola súa banda, desde a SD Ribadeo agradeceron a colaboración das administracións, entidades e empresas que apoian a organización do torneo, así como o traballo das familias vinculadas ao club. A directiva subliñou que a implicación do voluntariado resulta fundamental para garantir o éxito dunha competición que combina deporte, convivencia e promoción do territorio.
A presentación oficial contou coa presenza de representantes institucionais, responsables deportivos e membros da organización, que coincidiron en destacar o valor dun evento que converterá Ribadeo durante dous días no epicentro do fútbol base internacional.