Ribadeo reforza a mellora das parroquias coa renovación de contedores, marquesiñas e o tratamento das palmeiras
O Concello de Ribadeo continúa executando diferentes actuacións de mantemento e mellora nas parroquias co obxectivo de renovar infraestruturas e reforzar a conservación dos espazos públicos. Os traballos céntranse na reparación das bases dos contedores, na instalación de novas marquesiñas nas paradas de autobús e na protección das palmeiras fronte ao picudo vermello.
O concelleiro de Medio Ambiente, Diego Dos Santos, explicou que os operarios están a renovar de maneira progresiva as bases dos contedores, así como os elementos de suxeición e os propios recipientes que presentan un maior grao de deterioro. Segundo indicou, estas actuacións estanse levando a cabo en todas as parroquias do municipio para mellorar tanto a funcionalidade como a imaxe dos puntos de recollida de residuos.
Ao mesmo tempo, o Concello continúa coa colocación de novas marquesiñas para o transporte público. As últimas intervencións desenvolvéronse nas parroquias de Cruce, O Río e Piñeira, onde xa se instalaron novos espazos de abrigo para as persoas usuarias do autobús.
Paralelamente, a Concellería de Medio Ambiente mantén en marcha a terceira fase do tratamento preventivo das palmeiras contra o picudo vermello, unha praga que afecta a esta especie en numerosos territorios. A actuación consiste na aplicación dun insecticida sistémico específico co obxectivo de protexer os exemplares existentes no municipio e evitar o avance deste insecto.
Desde o Goberno local destacan que estes traballos continuarán durante o verán para manter en bo estado os servizos e espazos públicos de todo o termo municipal.