Ribadeo acollerá un taller sobre plantas silvestres comestibles dentro do proxecto Muiñeiras do Requiande
O proxecto Muiñeiras do Requiande organizará o vindeiro 28 de maio unha nova actividade centrada na recuperación de coñecementos tradicionais e na promoción dun modelo alimentario máis sostible e vinculado ao territorio. O encontro desenvolverase ás 19:00 horas no espazo de Requiande, en Cedofeita, no concello de Ribadeo.
Baixo o título “Compartindo Saberes”, a proposta xirará arredor das plantas silvestres comestibles presentes na Mariña lucense e no occidente asturiano, afondando nos seus usos tradicionais, propiedades e posibilidades dentro da alimentación local.
A iniciativa preséntase como un espazo de intercambio de experiencias e coñecementos, orientado a fomentar redes de colaboración arredor da soberanía alimentaria e da valorización dos recursos naturais da contorna. Desde a organización explican que o obxectivo pasa por avanzar cara a un sistema alimentario máis próximo, sostible e baseado na cooperación entre persoas e colectivos.
O taller contará coa participación de Amparo Grandío e Javier Montero, encargados de introducir ás persoas asistentes no coñecemento das especies vexetais silvestres empregadas tradicionalmente na gastronomía e na vida cotiá do territorio.
A actividade será de acceso libre, aínda que as persoas interesadas poderán realizar inscrición previa a través dos teléfonos facilitados pola organización ou mediante correo electrónico.
Muiñeiras do Requiande continúa así coa súa programación de encontros e obradoiros vinculados á recuperación de saberes populares, ao aproveitamento responsable dos recursos naturais e á creación de espazos comunitarios de participación e aprendizaxe compartida.