Queixas en Barreiros polo estado das beirarrúas, os parques e a recollida do lixo
Veciños de Barreiros manifestan o seu malestar polo estado de mantemento dalgunhas zonas do municipio, especialmente nas proximidades das praias. As principais reclamacións céntranse na limpeza dos espazos públicos e na necesidade de adaptar determinados servizos municipais ao importante incremento de poboación que se produce durante os meses de verán.
Un dos aspectos que máis preocupa é a recollida do lixo. Os residentes consideran que o servizo debería reforzarse durante a tempada estival para responder ao aumento de usuarios e á maior xeración de residuos. “Se se quere turismo hai que dar un bo servizo”, sinala unha veciña, que reclama unha maior atención a esta prestación durante os meses de maior afluencia.
As críticas esténdense tamén ao estado das beirarrúas nas zonas próximas á costa. Os veciños aseguran que existen puntos nos que as herbas e a vexetación medran sen suficiente control e consideran necesario intensificar os labores de roza, limpeza e acondicionamento, especialmente nunha época na que Barreiros recibe numerosos visitantes.
Outro dos asuntos que suscita malestar é a situación dalgúns parques infantís. Os residentes denuncian o deterioro destes espazos e demandan actuacións que permitan mellorar a súa conservación e garantir unhas instalacións adecuadas para os nenos e nenas.
Os afectados lembran ademais que os propietarios e residentes contribúen durante todo o ano a través dos seus impostos e taxas municipais, polo que consideran que esa achega debería verse correspondida cun adecuado nivel de conservación dos servizos e espazos públicos.
As reclamacións inciden especialmente nas áreas de praia, onde durante o verán se multiplica a actividade. Por este motivo, os veciños piden que o aumento de visitantes vaia acompañado dun reforzo da limpeza, da recollida de residuos e do mantemento das zonas públicas.