Portos de Galicia inicia as obras de mellora dun vial na zona portuaria de Foz
Portos de Galicia vén de poñer en marcha os traballos de reparación dun dos viarios situados na zona portuaria de Foz, unha actuación destinada a mellorar as condicións de circulación e a seguridade dos usuarios nun espazo de tránsito habitual tanto para vehículos como para peóns.
A intervención conta cun orzamento de 50.000 euros e céntrase na renovación do firme, que presentaba un avanzado estado de deterioración. Segundo se indicou, o levantamento do pavimento foi provocado en gran medida polo crecemento das raíces das árbores existentes na contorna, o que xerou deformacións na superficie e dificultaba o paso con normalidade.
Os traballos permitirán acondicionar o vial e recuperar unhas condicións adecuadas para o seu uso diario, eliminando os desperfectos acumulados e contribuíndo a unha maior comodidade para os usuarios do porto.
A actuación forma parte das labores de conservación e mantemento das infraestruturas portuarias que desenvolve Portos de Galicia en diferentes instalacións da comunidade autónoma co obxectivo de garantir o seu correcto funcionamento e prolongar a súa vida útil.
O prazo previsto para a execución das obras é de dous meses, período durante o que se realizarán as tarefas necesarias para a renovación completa do tramo afectado.