Ourol prepara a Ruta Indiana 2026 cunha nova apertura de inscricións en xullo
O Concello de Ourol xa traballa na organización da Ruta Indiana 2026, unha proposta que combina divulgación histórica, patrimonio e turismo e que se consolidou como unha das actividades máis destacadas da programación local.
A vindeira edición xa ten data para o inicio do proceso de inscricións, que se abrirá o 20 de xullo a través da páxina web www.concellodeourol.es. Deste xeito, as persoas interesadas poderán reservar praza para participar nesta experiencia que cada ano reúne a veciñanza e visitantes chegados doutros puntos.
A Ruta Indiana permite achegarse ao legado da emigración e á pegada arquitectónica e cultural deixada polos indianos no municipio, converténdose nun percorrido de referencia para a posta en valor da historia local.
Desde o Concello subliñan que esta iniciativa contribúe a dinamizar o turismo e a reforzar o coñecemento do patrimonio, ao tempo que favorece a participación cidadá en actividades culturais de carácter divulgativo.