Ourol acollerá un encontro sobre os retos e as oportunidades da migración no rural
O edificio Multiúsos de Ourol será o escenario o vindeiro 10 de novembro dun Encontro de Reflexión sobre Migracións e Mundo Rural, unha xornada destinada a analizar a realidade dos territorios rurais, os desafíos aos que se enfrontan e as posibilidades que ofrece a súa evolución.
A convocatoria está organizada por Ecos do Sur, en colaboración coa Fundación "la Caixa", e enmárcase no ciclo "A sustentabilidade dos espazos rurais". O obxectivo é crear un espazo de diálogo no que compartir experiencias e abordar cuestións relacionadas co presente e o futuro do rural.
A xornada contará coa participación de representantes das administracións públicas, entidades sociais, asociacións e empresas, que poderán achegar diferentes perspectivas sobre os retos e as oportunidades que presentan estes territorios.
O Concello de Ourol colabora no desenvolvemento desta iniciativa e destaca a importancia de promover encontros que permitan intercambiar puntos de vista e reflexionar colectivamente sobre o futuro do medio rural.