Deportes

A competición celebrarase entre maio e xuño en distintas categorías e converterá a vila ribadense nun punto de encontro deportivo para equipos de diferentes lugares

Ribadeo prepárase para vivir un novo verán marcado polo fútbol base coa celebración dunha nova edición dos Torneos organizados pola Sociedade Deportiva Ribadeo, unha cita xa plenamente consolidada dentro do calendario deportivo da Mariña e que cada ano reúne a clubs, familias e afeccionados chegados desde numerosos puntos da península.

A edición de 2026 desenvolverase ao longo de varias fins de semana entre os meses de maio e xuño e contará con competicións adaptadas ás categorías biberón, prebenxamín, benxamín, alevín, infantil e cadete. Os partidos disputaranse en diferentes instalacións deportivas da vila, tanto en campos de herba natural como nun terreo de xogo de céspede artificial destinado ao fútbol 8.

Desde a organización destacan que o torneo mantén o espírito co que naceu hai máis de vinte edicións: promover o deporte base e ofrecer aos máis novos unha experiencia de convivencia arredor do fútbol. Ao longo destes anos, Ribadeo converteuse nun destino habitual para equipos procedentes de distintas comunidades autónomas, ademais de recibir clubs chegados desde Portugal e Reino Unido.

O calendario arrancará os días 30 e 31 de maio coa categoría cadete. A continuación, o 6 de xuño disputarase o torneo correspondente á categoría prebenxamín, mentres que os benxamíns competirán durante os días 6 e 7. A categoría biberón terá tamén protagonismo o 7 de xuño.

Xa na segunda quincena do mes, os días 13 e 14 de xuño estarán dedicados á categoría alevín, mentres que os encontros infantís pecharán o programa deportivo os días 20 e 21 de xuño.

A SD Ribadeo explica que a modalidade da competición organizarase por grupos e que, salvo nalgunhas categorías específicas, os torneos se desenvolverán ao longo de dúas xornadas. Ademais do aspecto puramente deportivo, a entidade subliña tamén a importancia do ambiente social e familiar que acompaña cada edición.

Durante as fins de semana de competición, a localidade recibe centos de visitantes que aproveitan a súa estadía para coñecer diferentes atractivos turísticos da comarca, especialmente o litoral mariñán e espazos emblemáticos como a Praia das Catedrais.

Desde o club organizador inciden en que o evento busca combinar deporte, convivencia e promoción turística, ao tempo que ofrece aos máis pequenos a oportunidade de desfrutar dunha experiencia competitiva nun ambiente educativo e de compañeirismo.

As inscricións continúan abertas e a organización espera repetir a elevada participación rexistrada en edicións anteriores.