O Vicedo mellora camiños e actúa en 65 hectáreas para previr incendios
O Vicedo desenvolveu diferentes actuacións de mellora de camiños municipais e prevención de incendios forestais en varias parroquias do concello. Os traballos forman parte de dous programas diferenciados que contan con financiamento doutras administracións.
Por unha banda, realizouse o acondicionamento de vías municipais nas parroquias de Negradas, Suegos, San Román do Val e Cabanas. As intervencións chegaron aos lugares de Creximil, Mosteiros, Salgueiros, Fradería, O Pereiro, O Pazo e Tralaveiga.
Estas obras foron cofinanciadas polo Concello do Vicedo e a Deputación Provincial de Lugo con cargo ao Plan Deputación de Cooperación cos Concellos 2025, co obxectivo de actuar sobre diferentes infraestruturas viarias de titularidade municipal.
Prevención fronte aos incendios
Paralelamente, durante esta anualidade de 2026 executáronse tratamentos preventivos mecanizados contra os incendios forestais ao abeiro do convenio entre a Consellería do Medio Rural e o Concello do Vicedo para o período 2025-2026.
O plan aprobado contempla intervencións nun total de 65,02 hectáreas, distribuídas por sete parroquias. A maior superficie corresponde a Riobarba, con 14,36 hectáreas, seguida de Negradas, con 11,83; Cabanas, con 11,78; O Vicedo, con 10,50; San Román, con 8,89; Suegos, con 5,39; e Mosende, con 2,27 hectáreas.
Os traballos céntranse en vías e camiños forestais, áreas cortalumes e faixas de xestión da biomasa de titularidade municipal, ademais de zonas de servidume de camiños incluídas nas áreas previstas para a xestión da vexetación.
A axuda establecida para estes tratamentos mecanizados ascende a 350 euros por hectárea, cun máximo subvencionable de 70 hectáreas. O financiamento está participado nun 80 % polo Fondo Europeo Agrícola de Desenvolvemento Rural (Feader).
O convenio para as actuacións de prevención e defensa fronte aos incendios forestais conta cun orzamento de 129.000 euros e unha axuda pública de 69.600 euros, segundo a información do proxecto. O período de execución abrangue os anos 2025 e 2026.
Con estas dúas liñas de actuación, o municipio combina a conservación e acondicionamento da súa rede de camiños coa realización de traballos destinados a diminuír a acumulación de biomasa e mellorar a prevención dos incendios forestais.