O TSXG avala a reorganización do servizo de emerxencias impulsada polo Concello de Cervo
O Tribunal Superior de Xustiza de Galicia (TSXG) deu a razón ao Concello de Cervo no procedemento xudicial relacionado coa reorganización do servizo de emerxencias, ao concluír que a Administración local actuou conforme á legalidade ao modificar as condicións de traballo derivadas da finalización do convenio que sustentaba o funcionamento do Grupo de Emerxencias Supramunicipal (GES).
A resolución xudicial considera acreditada a existencia dunha causa organizativa suficiente para xustificar os cambios aplicados polo Concello e avala as decisións adoptadas polo goberno municipal ante a nova situación xerada tras o remate do acordo que regulaba o servizo.
O fallo tamén rexeita de maneira expresa as acusacións relativas a unha suposta vulneración de dereitos fundamentais. Neste sentido, o tribunal descarta que existisen represalias contra os traballadores afectados ou contra a actividade sindical desenvolvida pola CNT, concluíndo que as medidas responderon unicamente a criterios organizativos obxectivos e debidamente fundamentados.
Outro dos aspectos analizados pola sentenza fai referencia ao proceso de negociación previo á adopción das medidas. O TSXG entende que existiu un auténtico período de consultas entre as partes, con intercambio de propostas e respostas argumentadas, polo que non aprecia mala fe negociadora por parte da Administración local. Ademais, desestima as alegacións relacionadas coa liberdade sindical ao considerar que o procedemento seguido respectou en todo momento a normativa vixente.
Tras coñecerse o contido da resolución, a alcaldesa de Cervo, Dolores García Caramés, mostrou a súa satisfacción polo pronunciamento xudicial. A rexedora asegurou que a sentenza ratifica a posición defendida polo Concello desde o inicio deste proceso e sostivo que a actuación municipal estivo guiada pola responsabilidade, a transparencia e o cumprimento da legalidade.
García Caramés sinalou que a prioridade do goberno local foi garantir tanto a seguridade dos profesionais como a continuidade dun servizo considerado esencial para a veciñanza. Ademais, incidiu en que as decisións adoptadas responderon a necesidades organizativas reais e non a outras interpretacións que, segundo indicou, se trasladaron ao debate público.
A alcaldesa lembrou tamén que o Concello trasladou á Deputación de Lugo a necesidade de buscar solucións que permitisen evitar a adopción destas medidas. Segundo explicou, ante a falta de resposta por parte da administración provincial, o executivo local optou por tomar decisións que agora, segundo destacou, contan co respaldo da xustiza.
Desde o Concello consideran que esta resolución reforza a postura mantida durante todo o proceso e confirma a validez das actuacións desenvolvidas para asegurar a prestación dun servizo de emerxencias no municipio.