O Trail Monte Comado celebra a súa décima edición cun percorrido de 17 quilómetros
O Trail Monte Comado regresará a Barreiros o domingo 11 de outubro para celebrar a súa décima edición, consolidando unha cita que volverá combinar deporte e natureza nun percorrido polas inmediacións do monte que dá nome á competición.
A saída terá lugar ás 10.00 horas nas proximidades da igrexa de San Miguel de Reinante, xunto á pista de pádel, punto no que tamén estará situada a meta. Os participantes afrontarán aproximadamente 17 quilómetros por pistas e camiños forestais das abas do Monte Comado, atravesando zonas de Reinante, San Pedro de Benquerencia e San Miguel de Reinante. O trazado acumulará arredor de 1.000 metros de desnivel positivo.
A organización establece tres categorías en función da idade: sénior, veterana e veterana +. Haberá premios para os tres primeiros clasificados de cada unha delas, ademais dun podio absoluto masculino e feminino.
As inscricións permanecerán abertas ata as 23.59 horas do 8 de outubro, cun límite de 150 participantes. Ata o 30 de setembro o prezo será de 15 euros, mentres que entre o 1 e o 8 de outubro ascenderá a 20 euros. En ambos os casos poderá engadirse por 5 euros unha camiseta conmemorativa.
A carreira constitúe a quinta proba do circuíto Máis Km Barreiros e contará con cronometraxe mediante chip. O percorrido terá dous avituallamentos, un no quilómetro 9 e outro na meta.
A Asociación Cultural e Deportiva Praias de Comado e o Concello de Barreiros organizan a competición. Haberá Protección Civil, ambulancia medicalizada e servizo de duchas no campo de fútbol das Valgas. Ao remate, a organización ofrecerá pinchos aos participantes e acompañantes.