O PSOE do Vicedo proporá un plan para mellorar a accesibilidade e reorganizar os contedores nas rúas do municipio
O Grupo Municipal Socialista do Vicedo presentará no pleno ordinario previsto para o vindeiro 27 de maio unha moción orientada a mellorar a mobilidade peonil e a accesibilidade nos espazos públicos do municipio. A proposta contempla a elaboración dun Plan de Mobilidade e Reubicación de Contedores co fin de adaptar diferentes puntos da localidade ás necesidades da veciñanza.
Desde o PSOE explican que existen diversas zonas nas que a localización actual dos colectores de residuos reduce o espazo dispoñible nas beirarrúas e dificulta o tránsito das persoas. Segundo sinalan, esta situación afecta especialmente á poboación de maior idade, ás persoas con mobilidade reducida e a quen utiliza cadeiras de rodas ou carriños infantís, obrigando nalgúns casos a circular pola calzada.
A iniciativa tamén recolle a necesidade de revisar o estado das ramplas e accesos existentes nas rúas do municipio para detectar posibles barreiras arquitectónicas e puntos que poidan supoñer un risco para os usuarios. O obxectivo é avanzar cara a un modelo urbano máis accesible e adaptado ás diferentes necesidades da cidadanía.
Entre as medidas incluídas na moción figura a reubicación progresiva dos contedores situados en zonas de paso, así como a continuidade da instalación de bases específicas e sistemas de ancoraxe que permitan unha mellor organización destes elementos no espazo público.
O texto tamén aposta por impulsar actuacións destinadas á mellora da accesibilidade nas beirarrúas e por solicitar axudas económicas doutras administracións para facilitar o financiamento das intervencións que resulten necesarias.
Desde o Grupo Municipal Socialista consideran que estas actuacións contribuirían a incrementar a seguridade viaria, favorecer a mobilidade peonil e mellorar a calidade dos espazos públicos do concello.
A portavoz socialista, Verónica Canoura, anima á cidadanía a asistir á sesión plenaria na que se debaterá a proposta. A edil lembra que os plenos municipais son abertos ao público e constitúen unha oportunidade para coñecer directamente os asuntos que se someten a debate e decisión no ámbito local.