O PP reclama cubrir as vacantes da Garda Civil do Vicedo, que actualmente conta cun só efectivo
O Partido Popular reclama ao Goberno central que cubra as prazas vacantes e adopte medidas para suplir as baixas existentes no Posto da Garda Civil do Vicedo, co obxectivo de recuperar a súa dotación efectiva de persoal e permitir que poida atender cos seus propios medios os servizos ordinarios.
Segundo explicou o alcalde, Jesús Novo, a situación actual deixa as dependencias cunha capacidade moi limitada. "Na actualidade o Posto do Vicedo só dispón dun efectivo", asegurou. O rexedor indica que o catálogo contempla oito efectivos, pero os restantes se atopan de baixa e a praza de sarxento permanece sen cubrir ao non ter sido convocada.
Esta falta de persoal repercute, segundo os populares, na atención que se presta á cidadanía. O PP sinala que as dependencias do Vicedo non ofrecen atención presencial todos os días da semana, xa que esta só está dispoñible cando o cabo se atopa de servizo. Para formar patrullas é necesario, ademais, recorrer a axentes doutros postos.
Os senadores lucenses do PP José Manuel Balseiro, José Manuel Barreiro e Juan Serrano trasladaron esta cuestión ao Goberno central a través de varias preguntas escritas. Na resposta recibida, o Executivo sinala que a operatividade no municipio é atendida habitualmente por patrullas do Núcleo de Viveiro, con reforzos nalgunhas ocasións doutras patrullas de Seguridade Cidadá do Núcleo de Burela e, de maneira puntual, da PAFIF de Foz e do SEPRONA de Xove.
Os populares critican, con todo, que o Goberno non concretase a súa previsión para completar a dotación do posto e recuperar unha prestación ordinaria do servizo con persoal propio.
Jesús Novo considera que a situación non pode normalizarse e cualifícaa como "unha burla para O Vicedo". "Os veciños e veciñas do Vicedo merecemos que se preste o servizo con normalidade con persoal propio", sostén o alcalde.
Desde o PP inciden na importancia da Garda Civil para os municipios rurais tanto no ámbito da seguridade como na resposta ás incidencias cotiás. Os senadores consideran "incomprensible" que un posto poida permanecer durante un período prolongado sen capacidade operativa suficiente cos seus propios efectivos.
A formación estende a crítica ao conxunto da provincia e asegura que a falta de persoal afecta tamén a outros postos da Garda Civil de Lugo, unha situación que interpreta como un deterioro dos servizos públicos no rural.
Os populares poñen ademais o foco no feito de que O Vicedo conta cun cuartel de recente construción. Ao seu xuízo, dispoñer dunhas instalacións adecuadas perde utilidade se estas non contan cos efectivos necesarios para manter unha atención presencial ordinaria e garantir a plena operatividade do posto.
Ante esta situación, Jesús Novo levará ao Pleno municipal do próximo 30 de setembro unha proposta para instar ao Goberno de España a cubrir as baixas e as prazas vacantes da Garda Civil do Vicedo. O alcalde agarda que a iniciativa conte co respaldo de todos os grupos da Corporación municipal.