O PP de Foz forza a retirada dun recoñecemento de crédito de 466.000 euros no último pleno
O último pleno municipal de Foz deixou un novo choque político arredor da situación económica do Concello. O Partido Popular, co apoio do BNG, conseguiu que o goberno local retirase o expediente de recoñecemento extraxudicial de crédito por importe de 466.000 euros correspondente a facturas pendentes do pasado exercicio que o executivo pretendía incorporar ao orzamento prorrogado.
O portavoz popular, Javier Castiñeira, explicou que a proposta chegou á sesión plenaria acompañada de reparos da intervención municipal e informes técnicos desfavorables, circunstancia que, ao seu xuízo, impedía sacar adiante o expediente nas condicións presentadas polo equipo de goberno.
Desde o PP consideran que esas facturas deberían incluírse nun novo documento orzamentario e non cargarse sobre as contas prorrogadas. Castiñeira sostén que o actual escenario económico obriga ao executivo local a presentar uns novos orzamentos que permitan reflectir “a realidade do gasto municipal” e evitar que a situación se repita no futuro.
Os populares lembraron tamén que o Concello conta cun plan económico-financeiro que xa contempla a necesidade de aprobar novas contas municipais para garantir unha planificación máis estable. Segundo indicou o portavoz do PP, a oposición entende que incorporar agora eses pagos ao orzamento prorrogado podería provocar dificultades nos próximos meses, especialmente de cara ás facturas que se xeren durante o segundo semestre do ano.
Durante a súa intervención, Castiñeira respondeu tamén ás críticas realizadas polo alcalde e asegurou que o seu grupo está a favor de que os provedores municipais cobren “o antes posible”, aínda que insistiu en que iso debe facerse “con seguridade e dentro dun marco económico ordenado”.
O Partido Popular defende que a solución pasa pola elaboración inmediata dun novo orzamento municipal para 2026, co obxectivo de regularizar a situación económica e evitar novos problemas de financiamento ou falta de consignación nas partidas.