O Pleno de Burela impulsa avances urbanísticos e sociais e reclama máis apoio en vivenda
O Pleno do Concello de Burela celebrou hoxe unha sesión ordinaria na que se abordaron asuntos considerados de gran relevancia para o presente e o futuro do municipio. A corporación deu luz verde a unha modificación do gasto plurianual ligada ao financiamento da nova Estación Depuradora de Augas Residuais (EDAR), unha infraestrutura que o goberno local cualificou de “peza esencial para garantir a sostenibilidade ambiental e permitir o crecemento urbanístico ordenado de Burela”.
Tamén se aprobou unha modificación do Plan Xeral de Ordenación Municipal, orientada –segundo explicou o executivo– a corrixir cuestións técnicas e adaptar o documento ás necesidades reais dun territorio en constante evolución, mellorando a súa coherencia e operatividade.
Nun segundo bloque do debate, a corporación aprobou por unanimidade a moción presentada polo BNG en torno ao 25N, incorporando unha achega do Partido Popular que reforza a exixencia de incrementar recursos públicos na loita contra a violencia machista. A sesión avanzou despois coa rexeita da moción do PP sobre a Lei de Protección dos Dereitos e Benestar dos Animais, ao considerar o goberno municipal que “a norma xa se aplica con total normalidade en Burela e que unha declaración institucional non suporía ningunha mellora práctica”.
Posteriormente, o Pleno deu luz verde –neste caso co voto en contra do PP– á emenda do Grupo Socialista á moción popular sobre ocupación de vivendas. O texto resultante reitera o rexeitamento a calquera ocupación ilegal e aposta pola activación de protocolos rigorosos, a axilización dos procedementos e o reforzo dos mecanismos de seguridade e convivencia.
O executivo municipal subliñou que, máis alá das ocupacións puntuais, o principal problema residencial en Burela é o acceso á vivenda, condicionado por prezos elevados, escaseza de alugueiros e unha oferta insuficiente de vivenda protexida. Por este motivo, o acordo insta tanto á Xunta de Galicia como ao Goberno do Estado a incluír a comarca da Mariña nos seus plans de vivenda, impulsar alugueiros accesibles e incrementar o parque público.
A corporación concluíu resumindo a súa posición con rotundidade:
“Tolerancia cero coa ocupación e tolerancia cero coas alarmas falsas. Firmeza na seguridade e seriedade nas políticas de vivenda”.