O CEIP Plurilingüe A Pontenova recibe un premio por reivindicar o valor do rural e da memoria mineira
O CEIP Plurilingüe A Pontenova vén de recibir un dos premios do cuarto concurso audiovisual Anpas Galegas Somos Rural grazas ao proxecto “Fíos de ferro, fíos de vida”, unha iniciativa coa que o centro quixo reivindicar a identidade do rural pontenovés e poñer en valor a conexión entre a memoria mineira da localidade e a vida actual da súa comunidade. O galardón inclúe unha achega económica de 500 euros destinada ao financiamento de actividades extraescolares relacionadas co coñecemento da cultura, do patrimonio e da historia do municipio.
O traballo naceu coa intención de desmontar a visión negativa que ás veces pesa sobre o rural e transmitir ao alumnado que a vida nas pequenas localidades está chea de experiencias, historia e oportunidades. Desde o centro educativo explican que a Pontenova representa un territorio no que a natureza, o río Eo, as fragas, as serras e o pasado industrial forman parte da identidade colectiva e da vida diaria das familias.
A proposta audiovisual construíuse arredor dunha metáfora simbólica: os “fíos de ferro”, que representan o pasado mineiro ligado ás minas, aos fornos e ao antigo tren que transportaba o mineral ata Ribadeo, e os “fíos de vida”, asociados á natureza, ás tradicións, á convivencia e ás persoas que manteñen vivo o territorio. A través desa unión entre pasado e presente, o alumnado buscou amosar que o futuro do rural tamén se constrúe desde a memoria e o sentimento de pertenza.
O proxecto estrutúrase en diferentes formatos. A peza principal é un vídeo de menos de tres minutos no que se mesturan narracións en primeira persoa, escenas do patrimonio industrial, imaxes da contorna natural e momentos da vida cotiá na Pontenova. O traballo complétase cunha colección fotográfica dedicada ás paisaxes, ás antigas infraestruturas mineiras e aos espazos máis representativos do concello.
Un dos elementos máis simbólicos da iniciativa foi a creación dun cartel colectivo protagonizado por unha árbore construída coas pegadas dactilares de todo o alumnado do centro. Cada pegada converteuse nunha folla que simboliza a participación de cada neno e nena na construción do futuro do rural. O tronco da árbore representa precisamente eses “fíos de ferro” que conectan a historia mineira coa realidade actual da Pontenova.
A iniciativa desenvolveuse cunha metodoloxía totalmente participativa. O alumnado implicouse en todas as fases do proxecto, desde a investigación e a redacción dos textos ata a gravación das escenas, a elaboración das fotografías e o deseño do cartel final. Entre as actividades realizadas destacou tamén unha visita guiada á mina Consuelo, onde os estudantes puideron coñecer de preto o pasado mineiro do municipio equipados con cascos e lanternas, converténdose por un día en pequenos exploradores do patrimonio local.
A coordinación do proxecto correu a cargo da ANPA do CEIP A Pontenova, presidida por María Luísa Lombardero Fernández, coa participación de alumnado de Infantil e Primaria. Desde a comunidade educativa destacan que a experiencia permitiu reforzar o orgullo de pertenza ao territorio e transmitir unha mensaxe clara: o rural non é un espazo baleiro, senón unha realidade viva chea de memoria, identidade e futuro.