O Campus Ranas celebrará en Mondoñedo tres décadas formando xeracións arredor do baloncesto
Mondoñedo volverá situarse este verán no mapa do baloncesto base coa celebración dunha nova edición do Campus Ranas, unha proposta deportiva que alcanza o seu 30 aniversario convertida nun referente para centos de mozos e mozas chegados de distintos puntos de España.
O campus desenvolverase en dúas quendas, do 28 de xuño ao 3 de xullo e do 5 ao 10 de xullo, mantendo unha filosofía centrada tanto na mellora deportiva como na convivencia e no crecemento persoal dos participantes. Ao longo destas semanas, os asistentes combinarán sesións de adestramento, competicións e actividades lúdicas nun ambiente pensado para fomentar o compañeirismo e a aprendizaxe.
A iniciativa está dirixida a nenos, nenas e adolescentes de entre 8 e 18 anos, organizados en grupos adaptados á idade e ao nivel de xogo de cada participante. O obxectivo é ofrecer unha formación personalizada na que se traballen aspectos técnicos e tácticos do baloncesto baixo a coordinación de adestradores especializados.
Ademais do apartado deportivo, o Campus Ranas aposta tamén por actividades complementarias relacionadas coa motivación, os valores e a convivencia. O programa incluirá charlas, xogos e talleres, así como excursións a diferentes puntos de interese da contorna, entre elas unha visita á Praia das Catedrais ou unha ruta vinculada ao Camiño de Santiago.
As instalacións contarán con espazos deportivos, zonas verdes e piscina nas proximidades, ademais de servizos orientados á comodidade das familias e á seguridade dos participantes, incluíndo cobertura médica durante toda a estancia.
As persoas inscritas poderán escoller entre diferentes modalidades segundo as súas necesidades, desde opcións básicas ata fórmulas máis completas con manutención ou actividades específicas relacionadas coa preparación física e o perfeccionamento do tiro.
Coincidindo coa celebración das súas tres décadas de historia, a organización anunciou tamén descontos especiais para novos participantes durante o período de inscrición de febreiro, nunha edición que busca seguir consolidando a Mondoñedo como un punto de encontro do baloncesto formativo durante o verán.