O BNG propón crear no Vicedo un centro galego para valorizar os plásticos agrícolas
O BNG do Vicedo levará ao próximo pleno municipal unha proposta para impulsar a creación dun Centro Galego de Valorización de Plásticos Agrícolas, unha infraestrutura coa que a formación nacionalista pretende situar o municipio no ámbito da economía circular e ofrecer unha alternativa para a xestión dos residuos procedentes do sector primario.
O portavoz municipal do BNG, Miguel Gómez, sinala que a actividade agrícola e gandeira xera cada ano importantes cantidades de residuos plásticos, entre eles film de silo, plásticos de acolchado, mantas térmicas e tubaxes de rega. Segundo defende, o traslado destes materiais a longas distancias incrementa os custos de xestión e o impacto asociado ao seu transporte.
A proposta expón que o Vicedo lidere o proxecto e conserve a titularidade e o control da infraestrutura, mentres que a xestión técnica e industrial, o mantemento e o tratamento dos residuos se desenvolvan mediante un modelo de colaboración público-privada con empresas especializadas.
O obxectivo sería crear unha instalación de referencia para atender as necesidades do sector agrogandeiro galego e favorecer a recuperación e reciclaxe dos plásticos agrícolas. Gómez considera que o proxecto permitiría combinar a xestión dun problema ambiental coa xeración de actividade económica e emprego no municipio.
A iniciativa contempla tamén abrir contactos coa Xunta, o IGAPE e outras administracións para estudar posibles vías de financiamento e apoio, así como cos sindicatos agrarios e as cooperativas para analizar a viabilidade da proposta.
O portavoz nacionalista destaca a localización do Vicedo e a súa proximidade aos principais corredores gandeiros do norte de Galicia como elementos que, segundo o BNG, poderían favorecer a implantación da infraestrutura.
A proposta dá continuidade a anteriores iniciativas do BNG do Vicedo relacionadas coa xestión dos residuos plásticos agrícolas. En 2025, a formación xa formulou a creación dun punto limpo específico para estes materiais e reclamou financiamento para poñelo en marcha.
Para Miguel Gómez, o novo proxecto suporía ampliar esa proposta cunha infraestrutura de maior alcance, coa intención de que o municipio participe nun modelo de valorización e economía circular aplicado ao sector agrogandeiro.