Melloran a drenaxe na N-642 entre Ribadeo e a rotonda de acceso a Vegadeo
A Dirección Xeral de Estradas está a executar traballos de mellora na estrada N-642 ao seu paso por Ribadeo, concretamente no tramo de curvas situado entre a vila e a rotonda de Porto, que permite acceder a Vegadeo e conecta coa N-640.
A intervención céntrase na mellora do sistema de drenaxe dunha zona na que se viña acumulando unha importante cantidade de humidade. Esta situación dificultaba a circulación e incrementaba o risco para os condutores, especialmente durante as épocas máis húmidas do ano.
A escasa iluminación existente nese punto tamén contribuía a empeorar as condicións de seguridade. Ademais, a presenza continuada de humidade favorecía a aparición de verdello sobre a calzada, o que podía facer máis perigosa a circulación dos vehículos.
Para poder desenvolver os traballos, a zona permanece regulada mediante un semáforo, xa que durante a execución das obras só está habilitado un dos carrís. Os condutores deben, polo tanto, atender á sinalización e respectar as indicacións do dispositivo de regulación do tráfico.