David Navallo e Troitas Bravas pechan a tempada como campións da Liga Nacional de Billarda
A Liga Nacional de Billarda 2025-2026 baixou o pano este sábado en Remourelle cunha xornada final que serviu para coroar aos grandes vencedores da tempada. Nun ambiente festivo e cunha notable participación, a competición despediuse cunha tarde na que non faltaron a emoción, a rivalidade deportiva e a convivencia entre xogadores e afeccionados.
A clasificación individual deixou como gran protagonista a David Navallo que conseguiu proclamarse campión da tempada tras unha destacada actuación na final. Pola súa banda, Markytos presionou ata o final a Gundar, aínda que finalmente tivo que conformarse coa terceira praza.
Tamén, Sachas conseguiu ser Campión de Varados.
Na categoría feminina, as mellores clasificadas foron Aroa, Geni e Alba, mentres que en infantís Antía impúxose con autoridade por diante de Mateo e Mateo Ledesma.
Na competición por equipos, Troitas Bravas proclamouse campión da tempada tras sumar 89 puntos, superando a Billardeiros Musicais, que rematou con 87. O terceiro posto foi para Madia Leva, con 67 puntos acumulados ao longo do campionato.
A entrega de trofeos contou coa presenza do alcalde, acompañado do benxamín Martín, que participaron no acto de clausura dunha tempada que volveu consolidar a billarda como unha das actividades deportivas e tradicionais con máis seguimento na comarca.