Comezan as obras de remodelación da Avenida de América cun investimento de 350.000 euros
As obras de mellora da Avenida de América xa están en marcha en Ribadeo, unha actuación que contará cun investimento de 350.000 euros, financiado nun 80 % pola Xunta de Galicia e no 20 % restante polo Concello. O alcalde, Dani Vega, definiu este proxecto como unha intervención "prioritaria e estratéxica" para o municipio, ao tratarse dunha das principais vías de entrada á vila.
O rexedor explicou que os traballos permitirán renovar tanto as infraestruturas soterradas como os elementos visibles da rúa. Neste sentido, destacou a substitución das redes de saneamento e abastecemento, unha actuación que, segundo indicou, facilitará futuras intervencións urbanísticas, especialmente no barrio de Cantalarrana, ao quedar renovado o conduto principal da zona.
Ademais da modernización das canalizacións, o proxecto contempla a construción dunha rotonda que dará acceso ao novo centro de saúde, así como a renovación integral das beirarrúas para mellorar a accesibilidade. A actuación completarase coa instalación dunha nova iluminación pública, a actualización da sinalización viaria e a reposición do pavimento.
Dani Vega subliñou que esta intervención forma parte da planificación impulsada polo Goberno local para continuar renovando diferentes rúas do municipio. Neste contexto, lembrou outras actuacións levadas a cabo recentemente, como as executadas na rúa Buenos Aires e na rúa Reinante.
O alcalde asegurou que o Concello continuará traballando na captación de financiamento doutras administracións para seguir avanzando na modernización da rede viaria municipal e impulsar novas actuacións de mellora en distintos puntos de Ribadeo.