César Mogo acusa o PP de converterse nunha "metralladora de erros" co paseo e a rotonda de Cangas
O senador socialista por Lugo César Mogo respondeu ás críticas do PP sobre a situación do paseo marítimo e a segunda rotonda de Cangas, en Foz, acusando os populares de cometer "un erro tras outro" nas súas valoracións sobre ambas actuacións. "Na Mariña o PP converteuse nunha metralladora para erros", afirmou.
As declaracións chegan despois de que o PP denunciase novos atrasos na reconstrución do paseo marítimo de Cangas e acusase a Costas do Estado e ao Concello de Foz de falta de coordinación. Os populares tamén cuestionaron que as expropiacións necesarias para desbloquear determinadas actuacións recaian sobre as arcas municipais.
Mogo atribuíu estas críticas á proximidade das eleccións e á intención dos representantes populares de gañar protagonismo. "A medida que se achega o ano electoral, máis se moven os senadores do PP para tentar sacar cabeza, non sexa que os saquen das candidaturas", ironizou.
O senador considera que esa estratexia está levando os populares a pronunciarse sobre cuestións técnicas sen contar, ao seu xuízo, co coñecemento necesario. "Non só queren suplantar aos enxeñeiros e técnicos en estradas e costas, senón que deixan ás claras as súas moitas carencias para sentar cátedra sobre obras que necesitan de coñecementos e especialización", sostivo.
Un dos puntos nos que Mogo rebate directamente ao portavoz municipal do PP, Javier Castiñeira, é o relativo á segunda rotonda de Cangas, na intersección da N-642 coa estrada autonómica que comunica coa zona de Ferreira do Valadouro. O socialista asegura que é incorrecto afirmar que corresponde ao Concello expropiar os terreos necesarios para esta actuación.
"O exalcalde e excandidato Javier Castiñeira permítese dicir que é o Concello quen ten que expropiar os terreos para a rotonda de Cangas cando quen expropiou foi Estradas do Estado", afirmou. Para Mogo, este tipo de afirmacións demostran que "os responsables parlamentarios e municipais do PP na Mariña viven completamente fóra da realidade".
O senador socialista cargou tamén contra o argumento dos populares sobre os terreos necesarios para executar o retranqueo e reconstrución do paseo marítimo de Cangas, derrubado pola acción do mar en febreiro de 2024.
Mogo considera contraditorio que o PP critique que o Concello facilite terreos para unha actuación que executará o Estado mentres, ao mesmo tempo, reclama que a Administración municipal poña parcelas á disposición do Goberno autonómico para desenvolver infraestruturas da súa competencia.
"Resulta completamente inaudito que, falando do retranqueo do paseo marítimo, critiquen que o Concello achegue os terreos porque o executa o Estado, pero en cambio esixan ao mesmo Concello que achegue terreos para un centro de saúde ou para calquera das poucas actuacións da Xunta", manifestou.
Para o senador, ambas posicións son incompatibles. "Ou sorber ou soprar; as dúas cousas á vez chámase demagoxia", criticou, dirixindo as súas palabras tanto aos senadores populares como ao portavoz do PP de Foz.
Mogo defendeu, ademais, que as dúas actuacións cuestionadas polos populares están avanzando, aínda que se atopan en momentos diferentes. No caso da rotonda, asegurou que o inicio dos traballos está próximo: "As obras de execución da rotonda de Cangas son inminentes".
Sobre o paseo marítimo, recoñeceu que o proceso pode resultar menos perceptible para a cidadanía, pero sostivo que se están completando trámites necesarios antes de acometer a intervención. Segundo explicou, "a reconstrución do paseo marítimo está nunha fase quizá pouco visible publicamente pero imprescindible para que pronto se acometa".
O senador por Lugo pechou a súa resposta insistindo nas críticas ao PP e acusando os seus representantes de trasladar información errónea sobre ambos proxectos. Ao seu xuízo, "senadores e exalcalde e excandidato de Foz convertéronse nunha metralladora de erros por falta do coñecemento sobre o que están a falar".