Cervo inicia a renovación integral do parque infantil Isaac Díaz Pardo e Luís Seoane
O Concello de Cervo puxo en marcha as obras de remodelación integral do parque infantil Isaac Díaz Pardo e Luís Seoane, situado xunto á rotonda próxima á Casa do Concello. A actuación, financiada integramente con fondos municipais, supón un investimento de 261.385,74 euros e permitirá transformar por completo unha das principais zonas de lecer infantil da localidade.
A alcaldesa, Dolores García Caramés, e o concelleiro Adrián Arias achegáronse ao lugar para supervisar o inicio dos traballos, que contemplan a renovación total das áreas de xogo mantendo a súa localización actual.
O proxecto inclúe a retirada dos elementos deteriorados para instalar novos xogos homologados, a colocación dun pavimento continuo de caucho que reforzará a seguridade dos usuarios e a substitución do peche perimetral, adaptando todo o recinto aos criterios actuais de accesibilidade e protección.
Un dos aspectos máis destacados da intervención será a ampliación da zona destinada aos nenos e nenas de maior idade, coa incorporación de novas estruturas pensadas para ofrecer máis posibilidades de xogo. O futuro parque tamén contará con espazos adaptados ás primeiras etapas da infancia e con elementos inclusivos, favorecendo que todos os menores poidan compartir o lecer nas mesmas condicións.
Entre as novidades máis agardadas figura a instalación dunha tirolina, unha proposta que, segundo explicou a alcaldesa, respondía a unha das peticións máis repetidas polos propios usuarios do parque. Dolores García Caramés sinalou que o Concello recolleu esa demanda para convertela nunha realidade dentro deste proxecto de modernización.
A rexedora destacou que esta actuación permitirá ofrecer ás familias un espazo renovado, máis funcional e adaptado ás necesidades actuais, ao tempo que reafirma a aposta municipal por investir recursos propios na mellora das infraestruturas públicas.
Cando rematen as obras, o parque contará cunha gran estrutura de aventura para os máis maiores, outra destinada aos nenos e nenas de menor idade, novos columpios, xogos de muelle, elementos inclusivos e a nova tirolina, todo iso instalado sobre un pavimento de seguridade que contribuirá a facer deste recinto un lugar máis cómodo, accesible e atractivo para a infancia.