Cervo impulsa a décima edición do seu programa de voluntariado xuvenil para o verán
O Concello de Cervo puxo en marcha unha nova convocatoria de “Cervo a carón do voluntariado”, un programa destinado a mozos e mozas de entre 16 e 30 anos que busca fomentar a participación activa da xuventude na vida do municipio durante os meses estivais. A iniciativa alcanza este ano a súa décima edición, unha cifra que confirma a consolidación dun proxecto que se converteu nun referente das políticas municipais dirixidas á mocidade.
Co obxectivo de achegar a proposta ás novas xeracións, a alcaldesa de Cervo, Dolores García Caramés, desprazouse ata o IES Marqués de Sargadelos para presentar o programa ao alumnado de cuarto da ESO e primeiro de Bacharelato. Durante o encontro animou aos estudantes a participar nunha experiencia que definiu como enriquecedora tanto no plano persoal como no colectivo.
A rexedora destacou que esta iniciativa permite aos mozos manter un vínculo directo con proxectos municipais que forman parte da súa propia traxectoria vital. Neste sentido, lembrou que moitos dos actuais alumnos participaron anos atrás en actividades promovidas polo Concello, como o programa Cervo Concilia, e que agora teñen a oportunidade de pasar ao outro lado da experiencia colaborando na organización e desenvolvemento destas propostas.
García Caramés incidiu tamén no valor educativo e social do voluntariado, ao permitir que a mocidade adquira responsabilidades, desenvolva habilidades de traballo en equipo e contribúa ao benestar da comunidade. Ademais, subliñou a importancia de que sexan os propios mozos e mozas quen acompañen e apoien ás xeracións máis novas nas diferentes actividades de verán.
As persoas participantes colaborarán en diversas iniciativas municipais e tamén noutras organizadas en coordinación co tecido asociativo local. Entre as propostas previstas figuran programas infantís, actividades culturais e proxectos de ocio alternativo. Os voluntarios poderán implicarse en iniciativas xa consolidadas como Cervo Concilia, as Noites Alternativas ou os servizos da Biblioteca Municipal.
Como novidade nesta edición, o programa amplía o seu ámbito de actuación coa incorporación de actividades relacionadas coa tradicional festa da Maruxaina e coa representación teatral da Queimada, dúas citas de grande arraigo no calendario cultural cervense.
O proxecto desenvolverase ao longo de todo o período estival. Cada participante poderá colaborar nas distintas actividades programadas cun límite máximo de 60 xornadas e seis horas por cada unha delas, favorecendo así unha participación flexible e adaptada ás posibilidades de cada persoa voluntaria.
As persoas interesadas en formar parte desta experiencia poden solicitar información adicional e tramitar a súa inscrición na Casa da Cultura de Cervo, onde permanecerá aberto o proceso de incorporación para esta nova edición do programa.